मोरङको सुन्दरहरैँचा–७ मा अर्धचेत अवस्थामा भेटिएकी २१ महिने बालिकाको मृत्यु भएको छ । उनीमाथि बलात्कार भएको आशङ्कामा प्रहरीले दुई जनालाई पक्राउ गरेको छ ।
मोरङ प्रहरी प्रमुख एसपी जनार्दन जिसीका अनुसार दुई जनालाई पक्राउ गरिको हो । उनीहरूलाई दिउँसो २ बजे पत्रकार सम्मेलन गरी सार्वजनिक गरिने उनको भनाइ छ ।
प्रहरीका अनुसार शुक्रबार साँझ घरबाट हराएकी २१ महिने बालिका घरनजिकैको झाडीमा अर्धचेत अवस्थामा भेटिएकी थिइन् । उपचारको क्रममा आज बिहान नोबेल मेडिकल कलेज विराटनगरमा उनको मृत्यु भएको हो ।
सुन्दरहरैचा–७ का वडा अध्यक्ष चैतन्यप्रसाद सिटौलाका अनुसार बालिकाको बलात्कार भएको आशङ्का गरिएको छ । यौनाङ्गमा रक्ताम्य भएकी बालिकालाई भेटेपछि आफन्तले गछिया मेडिकलमा लगेको बताउँदै उनले अवस्था हेर्दा बलात्कार भएजस्तो देखिने बताए ।
बेलुका ४ बजेबाट हराएकी बालिका घर पछाडि रहेको झाडीमा साढे ५ बजेतिर भेटिएपछि अस्पताल लगिएको उनले बताए । अस्पताल स्रोतका अनुसार २१ महिने बालिकाको यौनाङ्गमा गम्भीर चोट छ ।
शव पोस्टमार्टमका लागि बिपी कोइराला स्वास्थ्य विज्ञान प्रतिष्ठान धरान पठाइएको एसपी जिसीले जानकारी दिए । पोस्टमार्टमपछि थप विषय खुल्ने उनले बताए ।