अभिनेता पल शाहविरुद्ध जबरजस्ती करणीसम्बन्धी कसूरमा *नाबालिका गायिकाले किटानी जाहेरी गर्दा गरेकी छन् ।
विवाह गर्छु भनेर फकाएर जवर्जस्ती यौन सम्बन्ध राखेको भन्दै नायक पल शाह विरुद्ध उनले जिल्ला प्रहरी कार्यालय तनहुँमा बुधबार पीडित नाबालिकाका बुवासमेत उपस्थित भएर किटानी जाहेरी दर्ता गराएका हुन् ।
जाहेरी दर्ता गराउन जाँदा बाबुसँगै ती गायिकाले दिदी र भिनाजुलाई लिएर गएको समाचार स्रोतले बतायो । जिप्रका तनहुँका सूचना अधिकारी डिएसपी युवराज खड्काले आफू कार्यालय बाहिर भएको हुनाले यसबारे केही भन्न नसक्ने बताए ।
केटिएम दैनिकसँगको टेलिफोन सम्पर्कमा खड्काले भने ‘मलाई यसबारेमा धेरैतिरबाट सोधनी भएको छ, म कार्यालय बाहिर छु । आधा वा एक घण्टापछि कार्यालय पुग्छु अनि मात्र के भएको हो भन्न सक्छु ।’
यसअघि जिल्ला प्रहरी कार्यालय, कास्कीमा शाहविरुद्ध जाहेरी दिइएको थियो । तर, प्रहरीले घटनास्थल तनहुँ भएकाले तनहुँमै दर्ता गर्न सुझाव दिएको थियो ।
एउटा म्यूजिक भिडियोको सुटिङका क्रममा तनहुँ गएका बेला शाहले फकाएर आफूमाथि करणी गरेको उनले उजुरीमा उल्लेख गरेको स्रोतले जानकारी दियो । १८ वर्षभन्दा कम उमेरकी पीडित गायिकाले शाहले आफूमाथि फकाएर करणी गरेको दाबी गर्दै आएकी छन् ।
नायक पल शाहको अभिनय रहेको चलचित्र म यस्तो गीत गाउँछु-२ रिलिज हुनुअघि उनीविरुद्ध जाहेरी परेको हो । शुक्रबारबाट उक्त चलचित्र प्रदर्शनमा आउनेछ ।
कानुन भन्छ : नाबालिकासँग सहमतिमै शारीरिक सम्वन्ध राखे पनि जबरजस्ती करणी ठहर्छ
मुलुकी अपराध (संहिता) ऐन २०७४ को परिच्छेद १८ मा करणी सम्बन्धी कसुरको बारेमा व्यवस्था गरिएको छ । जस अनुसार दफा २१९ मा कसैले जवर्जस्ती करणी गर्न हुँदैन भन्ने व्यवस्था गरेको छ । कसैले कुनै महिलालाई निजको मञ्जुरी नलिई करणी गरेमा वा मञ्जुरी लिएर भए पनि अठार वर्षभन्दा कम उमेरको कुनै बालिकालाई करणी गरेमा निजले त्यस्तो महिला वा बालिकालाई जवर्जस्ती करणी गरेको मानिने कानुनले व्यवस्था गरेको छ ।
यस घटनामा पीडित एक अबोध बालिका हुन् र पल शाह सही–गलतको निर्णय लिन सक्ने एक परिपक्व र पूर्ण सचेत व्यक्ति हुन् । त्यसैले उनले समीक्षाप्रति अभिभावक/संरक्षकको भूमिका निर्वाह गर्नुपर्नेमा उनको अबोधता (मासुमियत) को फाइदा उठाएर करणी गरेको भन्ने व्याख्या कानुनले गर्छ ।
*सच्चाइएको : यसअगाडि पीडित बालिकाको नाम भुलबस पर्न गएको हुनाले यसलाई सच्चाइएको छ ।