काठमाडौं उपत्यकाका प्रशासन कार्यालयले कोरोना भाइरसको सङ्क्रमण रोकथाम र नियणन्त्रणको लागि माघ मसान्तसम्म भौतिक उपस्थितिमा विद्यालय सञ्चालनमा रोक लगाएका छन् ।
प्रशासनको उक्त आदेशको पालना गर्दै तीनवटै जिल्लामा अहिले विद्यालयहरू बन्द छन् तर काठमाडौंको गोकर्णेश्वर नगरपालिकाले भने भौतिक उपस्थितिमै विद्यालय सञ्चालन गर्ने निर्णय गरेको छ ।
उक्त नगरपालिकाको शिक्षा युवा तथा खेलकुद शाखाको उपसचिव विजयप्रसाद आचार्यले आउने आइतबारबाट उक्त पालिकाभित्र रहेका सामुदायिक र संस्थागत विद्यालयहरू खोल्ने निर्णय भएको बताए ।
मंगलबार बसेको शिक्षा समितिको बैठकले माघ २३ गते आइतबारदेखि विद्यार्थीहरूको भौतिक उपस्थितीमै विद्यालय सञ्चालन गर्ने निर्णय गरेको हो ।
तोकिएको मापदण्ड अनुसारको वातावरण तय भए नभएको विषयमा नगरपालिकाबाट अनुगमन गरिने र सो अनुसार नपाइएमा नियमानुसार भइजाने समेत सूचनामा उल्लेख छ।
अघिल्लो पटक पनि भौतिक उपस्थितिमा विद्यालय पहिलो चोटि सञ्चालन गर्ने गोकर्णेश्वर नगरपालिका थियो। यस अघि निजी तथा आवासीय विद्यालय अर्गनाइजेसन (प्याब्सन) को गोकर्णेश्वर नगर कमिटीले स्वास्थ्य सुरक्षाका मापदण्ड पालना गरेर विद्यालय सञ्चालन गर्ने अनुमति दिन नगरपालिकाको ध्यानाकर्षण गराएको थियो।
