राप्रपा अध्यक्ष राजेन्द्र लिङ्देनले पार्टीका कार्यक्रमहरूमा माला, खादालगायतका तामझाम नगर्न ७७ जिल्ला कार्यसमितिलाई निर्देशन दिएका छन् ।
पार्टीका अध्यक्ष, पदाधिकारी, केन्द्रीय सदस्य, प्रतिनिधिहरू जिल्लाको भ्रमणमा जाँदा वा स्थानीय तहका कार्यक्रममा माला, खादा, उपहार तथा कुनै किसिमको तामझाम नगर्न, सादगी व्यवहार आचरण अपनाउन मातहतका निकायलाई अध्यक्षको निर्देशानुसार सर्कुलर गरिएको राप्रपाले जनाएको छ ।
आज राप्रपाका महामन्त्री भुवन कुमार पाठकले एक निर्देशन जारी गर्दै खादा, माला उपहार लगायत अन्य सामाग्री र तामझामको व्यवस्था नगर्न निर्देशन दिएका हुन् ।
स्मरणीय होस पुष ९ गते दाङमा भएको एक कार्यक्रममा राप्रपा अध्यक्ष लिङ्देनको स्वागतको लागि २५ किलोको माला बनाइएको थियो तर नवनिर्वाचित अध्यक्षले उक्त माला लगाउन अस्विकार गरे ।
बिहीबार राप्रपा दाङले तुलसीपुरमा आयोजना गरेको सभालाई सम्बोधन गर्न पुगेका लिङ्देनले २५ किलोको माला लगाउन अस्वीकार गरेका हुन् ।
किन माला नलगाउनुभएको ? भन्ने प्रश्नमा लिङ्देनले भने, ‘मैले काम नै के गरेको छु र यो सुन्दर फूलको माला लगाउनलाई । म यो माला लगाउन लायक अझै भइसकेको छैन ।’ उनले आफू देश र जनताको लागि केही उल्लेखनीय काम गरेपछि मात्रै माला लगाउन लायक हुने बताए। ‘यो फजुल खर्च हो,’ उनले भने, ‘खुसी पार्ने नाममा यति ठूलो माला तयार पार्नु र फूलहरु नष्ट गर्नु सही होइन।’
अध्यक्षले नै माला लगाउन नमानेपछि मञ्चमा रहेका अरू नेताले पनि लगाएको माला निकालेका थिए ।