राष्ट्रिय प्रजातन्त्र पार्टी राप्रपाका नेता विक्रम पाण्डे राजेन्द्र लिङ्देन समूहमा खुलेका छन् । राप्रपा महाधिवेशनमा पूर्वमन्त्री पाण्डेलाई कमल थापा र लिङ्देन दुवै समूहले आफ्नो प्यानलमा राखेका थिए ।
तर, पाण्डे लिङ्देन समूहमा खुलेका हुन् । राप्रपामा चार उपाध्यक्ष रहने व्यवस्था छ । पाण्डेलाई लिङ्देन समूहले उपाध्यक्षमा राखेको छ । उता थापा समूहले पनि उनलाई आफ्नो उपाध्यक्षमा राखेको थियो ।
पाण्डे राप्रपाका प्रभावशाली नेता मानिन्छन् । पाण्डे अन्तिम समयमा लिङ्देनको र्यालीमा सहभागी भएर थापासँग आफू नभएको सन्देश प्रवाह गरेका हुन् ।
मनोनयनको प्रारम्भिक नामावली आउन भने बाँकी छ । त्यसमा दाबी विरोध भई अन्तिम नामावली आएपछि पाण्डे कुन प्यानलबाट चुनाव लड्नेछन् भन्ने खुल्नेछ ।
नेपालको पहिलो नम्बरका निर्माण व्यवसायी पाण्डे चितवनमा राजनीतिक पकड भएका नेता हुन्। गत आम निर्वाचनमा राप्रपा संयुक्तको तर्फबाट पाण्डेले तत्कालीन नेकपा माओवादी केन्द्रका अध्यक्ष पुष्पकमल दाहाल प्रचण्डबिरुद्ध चितवन ३ मा प्रतिस्पर्धा गरेका थिए।
प्रचण्डले ४८ हजार २७६ मत ल्याएर विजयी हुँदा पाण्डेले ३८ हजार ९३५ मत प्राप्त गरेका थिए। उनी यसअघि दोस्रो संविधान सभा निर्वाचनमा चितवन ५ बाट प्रत्यक्ष निर्वाचित भएका हुन्। अहिले सो क्षेत्र चितवन ३ मा परेको छ, जहाँबाट नेकपा अध्यक्ष प्रचण्ड निर्वाचित भएका छन्।
निर्वाचन क्षेत्रमा बलियो पकड भएका पाण्डे मन्त्री समेत बनिसकेका हुन्।