सन्दीप लामिछानेले चौथो संस्करणको एभरेष्ट प्रिमियर लिग (इपिएल) मा काठमाडौं किङ्ग्स एलेभनको कप्तानी गर्ने भएका छन् । काठमाडौँ किङ्ग्सले सोमबार सन्दीपलाई कप्तानीको जिम्मेवारी सुम्पिएको हो ।
काठमाडौँ किङ्ग्सले सन्दीपको जन्मदिनको अवसर पारेर उनलाई कप्तानमा नियुक्त गरेको हो । इपिएलले जन्म दिवसको अवसर पारेर कप्तानको जिम्मेवारी पाएका सन्दीपको आगामी वर्षमा सफलताको कामनासमेत गरेको छ ।
इपिएल क्रिकेट असोज ९ गतेदेखि असोज २३ गतेसम्म टियु क्रिकेट मैदानमा हुनेछ । काठमाडौँ किङ्ग्सले इपिएलका लागि पाकिस्तानका पूर्व–क्रिकेटर शाहिद अफ्रिदीलाई अनुबन्धन गरेको थियो । अब, २२ वर्षीय सन्दीपले उनीसँगै रहेर इपिएल खेल्ने छन् ।
गएको एक वर्ष सन्दीपका लागि अत्यन्तै चुनौतीपूर्ण रह्यो । इन्डियन प्रिमियर लिग (आइपिएल) खेल्न छनोट भएपनि उनले एउटै खेलमा अवसर पाएनन् । आइपिएलको जारी संस्करणमा सन्दीपलाई अनुबन्धनका लागि कुनै पनि टोलीले चासो देखाएनन् ।
इग्ल्यान्डमा ‘द हन्ड्रेड’ र भाइटलिटी ब्लास्टका लागि अनुबन्धन सम्झौता गरेपनि उनले भिसाका कारण दुवै फ्रेञ्चाइज लिग गुमाउन पुगेका थिए ।