काठमाडौँ । बलात्कार मुद्दामा क्रिकेटर सन्दीप लामिछाने दोषी ठहर भएका छन्।
काठमाडौँ जिल्ला अदालतका न्यायाधीश शिशिरराज ढकालको इजलासले उनलाई दोषी ठहर गरेको हो।
पीडित र पीडक दुवैतर्फका वकिलहरूको बहस सकेर आज आदेश सुनाइएको हो।
जिल्लाले कसुर ठहर गरेपछि कति सजाय हुने भने पछि निर्धारण गर्ने छ। फौजदारी संहिता अनुसार ३ वर्षभन्दा धेरै कैद सजाय हुने मुद्दामा सजाय पछि निर्धारण गरिन्छ।
जिल्ला अदालतले सजाय निर्धारणका लागि सुनुवाइ हुने मिति पुस २५ गतेका लागि तोकेको छ। उक्त दिन अदालतले कति सजाय र जरिवाना हुनेबारे निर्णय सुनाउने छ। उक्त फैसलापछि सन्दीप थुनामा बस्नुपर्ने छ।
२०७९ भदौ ५ गते बेलुका कफि खान भनेर भेट्न बोलाएर जबरजस्ती नगरकोट लगेर नियतबस ढिला गर्दै काठमाडौंको पिंगलास्थानमा रहेको एक होटलमा मध्यरातमा पटक पटक करणी गरेको भन्दै भदौ २१ गते प्रहरी वृत्त गौशालामा उजुरी परेको थियो ।
प्रहरीमा उजुरी पर्दा पूर्वनिर्धारित कार्यक्रमअनुसार क्यारेवियन प्रिमियर लिंग खेल्न वेष्ट इन्डिज पुगेका लामिछाने करिव एक महिनासम्म सम्पर्कबिहीन भएपछि नेपाल आएका थिए ।
लामिछानेविरुद्ध बलात्कारको उजुरी परेपछि २० असोजमा प्रहरीले उनलाई त्रिभुवन अन्तराष्ट्रिय विमानस्थलबाट पक्राउ गरेको थियो । त्यसबेला उनी अमेरिकाबाट नेपाल आएको बताइएको थियो ।
जिल्ला अदालत, काठमाडौंले लामिछानेलाई असोज १८ गते पुर्पक्षका लागि थुनामा पठाएको थियो । त्यसपछि लामिछाने करिब तीन महिना थुनामा बसेका थिए। तर, त्यसविरुद्ध लामिछानेले उच्च अदालत, पाटनमा पुनरावेदन गरेपछि उच्च अदालतले पुष २८ गते उनलाई २० लाख धरौटीमा सर्शत रिहा गर्न आदेश दिएको थियो ।