कैलालीमा दस वर्षीया आफ्नै छोरीलाई बलात्कार गरी झुन्ड्याएर मारेको अभियोगमा प्रहरीले एक जनालाई पक्राउ गरेको छ । पक्राउ पर्नेमा कैलाली लम्की चुहा नगरपालिका–२ बघनियाका ५१ वर्षीय एक पुरुष रहेका छन् । घटना अनुसन्धानकै क्रममा रहेका कारण उनको पहिचान गोप्य राखिएको जिल्ला प्रहरी कार्यालय कैलालीले जनाएको छ ।
जेठ २७ गते दिउँसो आफ्नै घरमा मृतावस्थामा फेला परेपछि घरपरिवारले दाह संस्कार गर्ने तयारी गरिरहेका थिए । विशेष सूचनाका आधारमा इलाका प्रहरी कार्यालय लम्कीबाट खटिएको प्रहरी टोलीले घटनास्थल पुगेको थियो ।
प्रहरीले शव परीक्षणलगायतको कार्य पूरा गरी शव पोष्टमार्टम तथा यौनजन्य परीक्षणका लागि सेती प्रादेशिक अस्पतालमा पठाएको थियो । यस्तै, प्रहरीले घटना शङ्कास्पद देखिएकोले विभिन्न व्यत्तिीहरुसंग सोधपुछ तथा अनुसन्धान थालेको थियो ।
अनुसन्धानकै क्रममा मृतकका बुबाले छोरीलाई २७ गते दिउँसो आफ्नै भैँसी गोठमा लगेर जबरजस्ती करणी गरेको र पोल खुल्ने डरले भैँसी गोठमा नै झुन्ड्याई हत्या गरेको खुलेको प्रहरीले जनाएको छ ।
प्रहरीका अनुसार मृतकका बुबाले घटना लुकाउन आत्महत्या गरेको जस्तो देखाउन खोजेको अनुसन्धानको क्रममा खुलेको छ । घटनाको सुइ मृतकका बुबातिर नै देखिएपछि प्रहरीले जेठ ३० गते पक्राउ गरी ज्यानसम्बन्धी कसुर (कर्तव्य ज्यान) शीर्षकमा मुद्दा दर्ता गरी कैलाली जिल्ला अदालतबाट म्याद थप अनुमति लिई थप अनुसन्धान गरिरहेको छ ।
