हेर त, विडम्बना मेरो देशमा…!
जागिर खान लोकसेवा पास गर्नु पर्ने,
सेनामा जान प्रशिक्षण पास गर्नु पर्ने..!
इन्जिनियर बन्न IIT पास गर्नु पर्ने,
डाक्टर बन्न MBBS पास गर्नु पर्ने..!
अनि नेता बन्न केही पास नगर्नु पर्ने ?
अनि कसरी होस् देशमा विकास ?
*****
देश चलाउने शिक्षित ब्यूरोक्रेटहरुले,
एउटा अशिक्षित नेताको भनेको मान्नु पर्ने ?
योग्य व्यक्ति पाऊँमा र अयोग्य व्यक्ति ठाउँमा !
अनि किन न होस् भ्रष्टाचार?
*****
कमजोर र गरिब देशहरू माथि,
ऋण दिएर प्रभुत्व आफ्नो
गर्दैछ चीनले जसरी….!
MCC पास गराएर नेपालमा,
आधिपत्य गर्न खोज्या हो
अमेरिकाले पनि त्यसरी…..!
*****
अङ्ग्रेजीमा उखान छ “No Free Lunch”
समयमै बुझौँ यसको अर्थलाई…!
देख्न सकिरहेका छैनौँ हामीले,
पछाडी लुकेको इनका स्वार्थलाई…!
*****
शिक्षा पूरा गरेर न रहौँ जागिरको मात्रै भर,
उद्योग लगाऔँ र रोजगारदाता बनौँ…!
कृषिमा नै केही गरेर देखाऔँ अब,
आऊ साथी, मिलेर प्रगतिको खेत बारी खनौँ…!
*****
रेमिटेन्सको भरमा अब देशलाई न पालौँ,
थोरे पैसाको लोभमा बैँस खेर न फालौँ…!
गरौँला सबै मिली देशको विकास देशमै रहेर,
छैन बस्नु अब विदेशमा दुःख र पीडा सहेर…!
*****
ल्याण्ड लक्ड छ देश हाम्रो,
तर स्रोत र संसाधनले परिपूर्ण छ….!
उपयोग इनको सकेनौँ गर्न भने,
शिक्षा र ज्ञान रहने हाम्रो अपूर्ण छ ..!
*****
पानीको महत्त्वलाई बुझौँ,
र रोकौँ पानी आफ्नै देशमा….!
बनाऔँ बाँधहरू साना र ठुला,
उज्यालो पारौँ राष्ट्रलाई अर्कै भेषमा..!
*****
मात्र बिजुलीको उत्पादन,
र वितरणले नै देशको फेरिने छ मुहार..!
आफैमा समृद्ध बन्यौँ भने,
गर्नु पर्दैन कसैको सामु गुहार…!
*****
जानु पर्दैन कसैले खाडी र मुगलान,
बगाउनु पर्दैन पसीना तातो घाममा…!
पर्ने छैन लड्नु अर्काको लागि सिमानामा,
देशमै व्यस्त हुनेछौँ आफ्नो-आफ्नो काममा..!
*****
घरमै सिर्जना हुनेछन् लाखौँ,
रोजगारीका नयाँ-नया अवसरहरू …..!
कामका लागि जान्छौँ आज विदेशमा,
भोलि हामीले मगाउने छौँ कामदारहरू…!
*****
बाटा र घाटाहरू केही वर्ष न बनाउँला,
त्यो लगानी हाइड्रो परियोजनामा लगाउँला..!
त्यसै पनि दुःख पाइरहेका नै छौँ,
देशको समृद्धिका लागि केही वर्ष अरू दुःख उठाउँला..!
*****
हामी भन्दा पछि रहेका देशहरूले,
कति गरिसके आफ्नो देशको विकास..!
हामी झन-झन तल झर्दैछौं किनकि,
भएको छैन हामीहरूमा अझै चेतनाको विकास !
*****
भन्छौँ स्वतन्त्र राष्ट्र हौँ हामी,
तर के साँच्चै छौँ त हामी स्वतन्त्र ?
अयोग्य र भ्रष्टाचारी शासकहरूबाट,
कसरी जोगाउने देशको अर्थतन्त्र ?
*****
बलियो आँट र सफा नियत छ भने,
असम्भव केही छैन संसारमा…!
तर न आफूले गर्ने र अरूलाई गर्न दिने,
यस्ता बाँदरहरूको काम छैन अब देशमा…!
*****
अब जनता अल्मलिंदैन,
झूटा वचन र खोक्रा भाषणले..!
देश विकास हुन सकेन,
इनका यिनै बानीको कारणले…!
*****
यी अयोग्य नेताहरूलाई
दनक अब दिनु पर्छ…!
शिक्षित युवाहरूले अब,
जिम्मेवारी काँधमा लिनु पर्छ…!
*****
बाहिर बाट आलोचना गर्नु भन्दा,
आफै मूलधार मा धाउनु पर्छ…!
हाम्रो देशको समृद्धिका लागि अब,
युवा जनशक्तिले राजनीतिमा आउनु पर्छ…!
