राष्ट्रिय प्रजातन्त्र पार्टीका नेता एवम् सांसद राजेन्द्र लिङदेनको स्वास्थमा सुधार आइरहेको उनको पारिवारिक स्रोतले जनाएको छ ।
उनकी श्रीमती सीता थापा लिङदेनका अनुसार सांसद लिङदेनको शरिरमा अक्सिजनको लेबल बढेको छ । “उहाँ अहिले सामान्य बोलचाल गर्न सक्ने अवस्थामा हुनुहुन्छ ।” टेलिफोन सम्पर्कमा सीताले बताइन् ।
निमोनियाको संक्रमण र शरिरमा अक्सिजनको लेभल घटेपछि लिङ्देनलाई बिहीबार साँझ ८:३० बजे सेनाको हेलिकप्टरले झापाबाट त्रिभुवन विमानस्थल ल्याएको हो। विमानस्थलबाट सिधै लिङ्देनलाई ललितपुरस्थित मेडिसिटी अस्पताल लगिएको थियो ।
लिङ्देनको स्वास्थ्य अवस्थाको बारेमा जानकारी लिन कमल थापा मेडासिटी अस्पताल पुगेका थिए ।
लिङ्देनको पुन: कोभिड परिक्षणको निमित्त स्वाब लिईसकिएको छ । अस्पताल स्रोतका अनुसार अहिले अक्सिजन दिन परेको छैन।
त्यस्तै पार्टी अध्यक्ष डा. प्रकाशचन्द्र लोहनी पनि अस्पताल पुगेर लिङ्देनको स्वास्थ अवस्थाको वारेमा जानकारी लिएको राप्रपा सचिवालय सदस्य राजाराम बर्तौलाले जानकारी दिए।
झापामा राप्रपाले मंसिर २० गते आयोजना गरेको मोटरसाइकल र्यालीको नेतृत्व उनैले गरेका थिए । त्यसबेला उनी विरामी अवस्थामै हातमा ग्लोब र मुखमा मास्क लगाएर र्यालीमा सहभागी भएका थिए ।
गएको चुनावमा कांग्रेस नेता कृष्ण सिटौलालाई पराजित गर्दै राप्रपाका राजेन्द्र लिङ्देन झापा ३ बाट प्रतिनिधिसभा सदस्य सदस्यमा विजयी भएका हुन् ।
