काठमाडौं । नेपालसहित छिमेकी मुलुकसँगको सीमा विवाद उत्कर्षमा पुगेका बेला भारतीय *गृहमन्त्री अमित शाहले चेतावनीयुक्त अभिव्यक्ति दिएका छन् ।
एक भर्चुअल र्यालीलाई सोमबार सम्वोधन गर्दै उनले सीमामा छेडछाड गर्नु बच्चाको खेल नभएको भन्दै दण्डित हुनुपर्ने चेतावनीयुक्त अभिव्यक्ति दिएका हुन् ।
नेपाल, चीन, पाकिस्तानलगायत छिमेकी मुलुकसँगको भारतको सीमा विवादमा कायम रहेका बेला गृहमन्त्री शाहको सो अभिव्यक्ति आएको हो ।
चीनसँग वार्ता गरिरहेको भारतले नेपालसँग भने वार्ता गर्न आनाकानी गर्दै आइरहेको छ ।
लद्दाखमा भएको सीमा विवादबारे शुक्रबार र शनिबार चीनसँग वार्ता गरेको भारतले नेपालबाट गरिएको वार्ताको मितिलाई भने बेवास्ता गर्दै आएको छ । गत नोभेम्बर २ मा नेपालको अतिक्रमित भूमि लिम्पियाधुरा, कालापानी र लिपुलेकलाई समेटेर नक्सा जारी गरेको भारतले बारम्बार वार्तामा बस्न मानिरहेको छैन ।
वार्तामा बस्न नमानेको भारतले गत मे ८ मा लिपुलेक हुँदै मानसरोवर जाने बाटो उद्घाटन गरेपछि नेपालले पनि लिम्पियाधुरा, कालापानी र लिपुलेकलाई समेटेर आफ्नो राजनीतिक तथा प्रशासनिक नक्सा अद्यावधिक गरेको छ । नेपालको यस कदमको भारतले आपत्ति जनाएको छ । यही बेला गृहमन्त्री शाहको सो अभिव्यक्ति आएको हो ।
*सच्चाइएको
