काठमाडौं । राष्ट्रिय प्रजातन्त्र पार्टी (राप्रपा) की सांसद खुश्बु ओलीले हिन्दु राष्ट्र स्थापनाका लागि सडक र सदन दुवैबाट सशक्त आवाज उठाउनुपर्ने बताएकी छन् ।
नेपाल सनातन धर्म संस्कृति संगठनको दोस्रो केन्द्रीय महाधिवेशन उद्घाटन गर्दै उनले हिन्दु राष्ट्र स्थापनाका लागि राप्रपाले संसद्मा र धार्मिक गुरुहरूले सडकबाट आवाज उठाउनुपर्ने बताइन् ।
मठमन्दिरमा आउने सबै राजनीतिक दलका नेताहरूलाई हिन्दु राष्ट्रबारे प्रश्न गर्न उनले धार्मिक गुरुहरूलाई आग्रह गरिन् । नेताहरूलाई स्वागत र सम्मान गरे पनि हिन्दु राष्ट्र स्थापनाबारे जवाफ माग्नुपर्ने उनको भनाइ थियो ।
सनातनी समुदायको विश्वास गुम्दै गएको उल्लेख गर्दै ओलीले हिन्दु समुदायका पक्षमा आवाज उठाउन नसक्नु कमजोरी भएको बताइन् । गौहत्या, गौतस्करी तथा हिन्दु समुदायमाथि हुने हिंसाका घटनामा मौन नबसी सडकमा उत्रिएर विरोध र खबरदारी गर्नुपर्ने उनले बताइन् ।
उनले छठका क्रममा घाट भत्काइएको घटनामा राजनीतिक दलका नेताहरूले समेत चासो नदेखाएको भन्दै धार्मिक समुदायले आफ्ना कमजोरी पनि समीक्षा गर्नुपर्ने धारणा राखिन् । हिन्दु समुदायको व्यावहारिक रूपमा रक्षा गर्न संगठनले सक्रिय भूमिका खेल्नुपर्ने उनको भनाइ थियो ।
हिन्दु राष्ट्र स्थापनाका लागि राप्रपाले संसद्मा निरन्तर आवाज उठाउने र त्यसका लागि धार्मिक गुरुहरूले संसद्बाहिरबाट सहयोग गर्नुपर्ने उनले आग्रह गरिन् ।