जनकपुरधाम । मंसिर २३ गतेदेखि जनकपुरधाममा सुरु हुने साताव्यापी श्रीराम जानकी विवाहपञ्चमी महामहोत्सवलाई व्यवस्थित, भव्य र सुरक्षित बनाउन जानकी मन्दिरले विभिन्न समिति गठन गरेको छ ।
महोत्सवको व्यवस्थापनलाई प्रभावकारी बनाउन शान्ति सुरक्षा, प्रचारप्रसार, बजार व्यवस्थापन, रंगभूमि मैदान तथा प्रवेशद्वार व्यवस्थापन, पण्डाल निर्माण, ट्राफिक, खानेपानी र विद्युत् व्यवस्थापनलगायतका विषयमा छुट्टाछुट्टै समिति गठन गरिएको हो ।
महोत्सवको तयारीबारे बिहीबार जानकी मन्दिर परिसरमा आयोजित सर्वपक्षीय बैठकले समिति गठन गर्दै जिम्मेवारी बाँडफाँट गरेको छ । विगतका वर्षभन्दा यस वर्षको महोत्सवलाई थप व्यवस्थित र भव्य बनाउने उद्देश्यले बैठक आयोजना गरिएको मन्दिरले जनाएको छ ।
जानकी मन्दिरका महन्थ रामतपेश्वर दास वैष्णवको अगुवाइ तथा उत्तराधिकारी महन्थ रामरोशन दास वैष्णवको संयोजनमा सम्पन्न बैठकमा उत्तराधिकारी महन्थ दासले महोत्सव सफल बनाउन आवश्यक तयारी अघि बढाइएको जानकारी दिए ।
उनले महोत्सवलाई व्यवस्थित रूपमा सम्पन्न गर्न स्थानीय प्रशासन, सुरक्षा निकाय, स्थानीय तह र सम्बन्धित सरोकारवाला निकायबीच प्रभावकारी समन्वय तथा सहकार्य हुनुपर्नेमा जोड दिए ।
विवाहपञ्चमी महोत्सवमा सहभागी हुन नेपालका विभिन्न जिल्ला तथा भारतको अयोध्यासहितका स्थानबाट हजारौँ साधुसन्त र श्रद्धालु जनकपुरधाम आउने अपेक्षा गरिएको छ । उनीहरूको स्वागत, आवास, सुरक्षा तथा आवागमनलाई सहज बनाउने विषयलाई बैठकले प्राथमिकतामा राखेको छ ।
बैठकमा धार्मिक संघसंस्था, नागरिक समाज, जनप्रतिनिधि, सुरक्षा निकाय, सञ्चार क्षेत्र तथा विभिन्न सरकारी कार्यालयका प्रतिनिधिहरूको सहभागिता रहेको थियो ।