काठमाडौं । नेपाली कांग्रेसका पूर्वसभापति शेरबहादुर देउवाले आफूलाई पाँच पटक प्रधानमन्त्री बनाएको पार्टीका लागि ज्यान दिनसमेत तयार रहेको बताएका छन् ।
देउवा समूहको ललितपुर जिल्ला अधिवेशन उद्घाटन समारोहलाई सम्बोधन गर्दै उनले कांग्रेसप्रति आफ्नो प्रतिबद्धता व्यक्त गरेका हुन् ।
‘पाँच पटक प्रधानमन्त्री भइसकेँ, मलाई अब केही हुनु छैन । जुन पार्टीले मलाई पाँच पटक प्रधानमन्त्री बनायो, त्यो पार्टीका लागि ज्यान दिन पनि तयार हुनुपर्छ,’ देउवाले भने ।
कांग्रेस नेपाली जनताले निर्माण गरेको पार्टी भएकाले जनताका प्रतिनिधिबाहेक अरू कसैले कब्जा गर्न नसक्ने उनको भनाइ थियो ।
‘नेपाली कांग्रेस नेपाली जनताले बनाएको पार्टी हो । यो नेपाली जनताको पार्टी हो । जनताका प्रतिनिधिबाहेक कसैले हाइज्याक गर्न सक्दैन,’ उनले भने ।
पूर्वराजा ज्ञानेन्द्र शाहको प्रत्यक्ष शासनकालमा आफूले न्याय पाएको स्मरण गर्दै देउवाले अदालतबाट पुनः न्याय पाउने विश्वास व्यक्त गरे । १८ करोड रुपैयाँसँग जोडिएको विषयमा अदालतले निष्पक्ष निर्णय गर्नेमा आफू विश्वस्त रहेको उनले बताए ।
त्यस्तै, उनले २०८२ भदौ २३ र २४ गते भएका घटनालाई षड्यन्त्रको संज्ञा दिए । लोकतन्त्रका लागि संघर्ष गरेका नेताहरूका सन्तान र उनीहरूका आश्रम छानीछानी जलाइएको उनको दाबी थियो ।
कांग्रेसका संस्थापक नेताहरूका सन्तान आफूहरूसँगै रहेको उल्लेख गर्दै देउवाले सुवर्णशमशेरका सन्तानसँग पनि संवाद गर्ने बताए ।
‘बीपीका छोरा, गणेशमानजीका छोरा र महेन्द्रनारायण निधिका छोरा हामीसँगै हुनुहुन्छ । किशुनजीले विवाह नै गर्नुभएन । पार्टीका लागि पसिना बगाएका नेताहरूका सन्तान हामीसँगै हुनुहुन्छ,’ उनले भने ।
सुवर्णशमशेरका छोरा अहिले साथमा नभए पनि नातिहरू कार्यक्रममा आउन सक्ने र उनीहरूसँग आफूले कुराकानी गर्ने देउवाको भनाइ थियो ।
