काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आगामी निर्वाचन एमालेका लागि विगतको तुलनामा अनुकूल बन्दै गएको बताएका छन्। एमाले वाग्मती प्रदेश कमिटीको बैठकमा बोल्दै उनले आगामी निर्वाचनलाई रणनीतिक महत्त्वका साथ लिएर योजनाबद्ध रूपमा तयारीमा जुट्न कार्यकर्तालाई निर्देशन दिएका हुन्।
ओलीले स्थानीय तह, प्रदेशसभा, राष्ट्रिय सभा तथा राष्ट्रपति र उपराष्ट्रपति निर्वाचन एकअर्कासँग अन्तरसम्बन्धित रहेकाले सबैलाई उत्तिकै महत्त्वका साथ लिनुपर्ने बताए। स्थानीय तहको निर्वाचन स्थानीय सरकार गठनमा मात्र सीमित नरहने उल्लेख गर्दै उनले त्यसबाट राष्ट्रिय सभा निर्वाचनका लागि मतदाता पनि चयन हुने बताए।
स्थानीय तहका प्रमुख र उपप्रमुख राष्ट्रिय सभा निर्वाचनका मतदाता हुने भएकाले स्थानीय तहको परिणामले राष्ट्रिय सभा गठनमा समेत प्रभाव पार्ने उनको भनाइ थियो। त्यस्तै, प्रदेशसभा निर्वाचन प्रदेश सरकार गठन, स्रोतसाधन परिचालन र विकास निर्माणका साथै राष्ट्रिय सभा तथा राष्ट्रपति निर्वाचनका मतदाता चयनका दृष्टिले पनि महत्त्वपूर्ण रहेको उनले बताए।
आगामी निर्वाचनलाई केन्द्रमा राखेर संगठन निर्माणमा जुट्न निर्देशन दिँदै ओलीले स्थानीय तहको निर्वाचनमा विशेष ध्यान दिनुपर्ने बताए। पार्टीभित्रको एकता अभावले निर्वाचनमा धक्का व्यहोर्नुपरेको उल्लेख गर्दै उनले निर्वाचनमा असहयोग गर्नेहरूलाई वडा तहबाटै कारबाही गर्न निर्देशन दिए।
उनले आगामी निर्वाचनका लागि एमालेको अवस्था विगतको भन्दा सहज रहेको दाबी गरे। यद्यपि, सरकारको कार्यशैली भने अझै स्वेच्छाचारी रहेको उनको आरोप थियो।
गत फागुनमा सम्पन्न निर्वाचन भदौ २३ र २४ गतेको अराजकतालाई वैधानिकता दिन राज्यशक्तिको दुरुपयोग गरेर गराइएको ओलीको आरोप थियो। उक्त निर्वाचनमा राज्यशक्तिको प्रयोग गरी शान्तिपूर्ण रूपमा बुथ कब्जा गरिएको उनले दाबी गरे।
