काठमाडौँ । कास्कीको मादी गाउँपालिका–१ स्थित पर्यटकीय गाउँ सिक्लेसमा पर्यटकको आगमन बढेपछि भ्रमणमा जानुअघि अग्रिम जानकारी गराउन स्थानीयले आग्रह गरेका छन् ।
तिहारको भोलिपल्ट कात्तिक २६ गते एकैदिन एक हजार ३२४ जना पर्यटक सिक्लेस पुगेका थिए । मादी गाउँपालिका–१ का वडाध्यक्ष देवीजङ्ग गुरुङका अनुसार पर्यटक सूचना केन्द्रको तथ्याङ्कमा उक्त सङ्ख्या देखिएको हो । सिक्लेस पुग्ने पर्यटकमध्ये अधिकांश नेपाली रहेका छन् भने नौ जना विदेशी पर्यटक छन् ।
एकैदिन ठूलो सङ्ख्यामा पर्यटक पुगेपछि स्थानीय होटल तथा होमस्टेमा पाहुना व्यवस्थापन गर्न कठिनाइ भएको वडाध्यक्ष गुरुङले बताए । तिहार मनाउन घरबाहिर गएका केही होटल तथा होमस्टे सञ्चालक गाउँ नफर्किएका कारण व्यवस्थापनमा थप चुनौती भएको उनको भनाइ छ ।
सिक्लेस होटल व्यवस्थापन समितिका अध्यक्ष सुरेन्द्रजङ्ग गुरुङ ‘पारस’ले अग्रिम जानकारी र बुकिङ नगरी ठूलो सङ्ख्यामा पर्यटक आउँदा होटल तथा होमस्टेको क्षमताभन्दा बढी चाप परेको बताए । यद्यपि आफन्त तथा स्थानीयका घरमा समेत राखेर पर्यटकको व्यवस्थापन गरिएको उनले जानकारी दिए ।
दसैँतिहारपछि सिक्लेसमा पर्यटकको आगमन निरन्तर बढिरहेको भन्दै उनले भ्रमणमा निस्कनुअघि सम्बन्धित होटल, होमस्टे वा पर्यटन व्यवसायीसँग सम्पर्क गर्न आग्रह गरे ।
उनका अनुसार सिक्लेसमा ३२ वटा होटल र ३७ वटा होमस्टे सञ्चालनमा छन् । ती होटलमा एक हजार २०० र होमस्टेमा ३५० जना पाहुना राख्न सक्ने क्षमता छ । गाउँका अन्य घरमा समेत पाहुना व्यवस्थापन गर्दा एकैदिन करिब दुई हजार पर्यटकलाई सेवा दिन सकिने भए पनि पूर्वजानकारीबिना पर्यटक आउँदा समस्या हुने उनले बताए ।
सिक्लेस पर्यटन व्यवस्थापन समितिका अध्यक्ष लेखबहादुर गुरुङले पर्यटकको आगमनले स्थानीयको आम्दानी र रोजगारीमा वृद्धि गरेको बताए । उनका अनुसार गाउँका होटल तथा होमस्टेमा करिब १०० जना स्थानीयले रोजगारी पाएका छन् । पर्यटकको चाप बढ्दा सञ्चालकका परिवारका सदस्यले समेत पाहुना व्यवस्थापनमा सहयोग गर्ने गरेका छन् ।
पोखराबाट करिब ३८ किलोमिटरको दूरीमा रहेको सिक्लेसमा झन्डै ४०० घर छन् । गुरुङ समुदायको बाहुल्यता रहेको यस गाउँमा आउने अधिकांश पर्यटक प्रसिद्ध पर्यटकीय गन्तव्य कोरी र क्हफुचे हिमतालसम्म पदयात्राका लागि पुग्ने गरेका छन् ।
