दमौली (तनहुँ) । तनहुँको बन्दीपुर गाउँपालिका–१ तल्लोटारमा ६७ फिट अग्लो राष्ट्रिय झण्डासहितको पर्यटकीय पार्क निर्माण गरिने भएको छ ।
पृथ्वी राजमार्गको नजिकै निर्माण गर्न लागिएको पार्कमा राखिने विशाल राष्ट्रिय झण्डा बिहीबार पहिलोपटक बन्दीपुर बजारमा प्रदर्शन गरिएको छ । पार्क निर्माण समितिका अनुसार राजमार्ग भएर पोखरा र काठमाडौं आवतजावत गर्ने आन्तरिक तथा बाह्य पर्यटकलाई आकर्षित गर्ने उद्देश्यले यो योजना अघि बढाइएको हो ।
पार्कमा राखिने राष्ट्रिय झण्डा ६७ फिट अग्लो, ४५ फिट लामो र ३० फिट चौडा हुनेछ । विशाल झण्डासहितको पार्क निर्माणले बन्दीपुरको पर्यटकीय आकर्षण थप बढाउने अपेक्षा गरिएको छ ।
झण्डा पार्क निर्माण समितिका संयोजक शेरबहादुर रानाका अनुसार स्थानीयवासीको श्रमदानबाट निर्माण कार्य अघि बढाइएको छ । हालसम्म १५ लाख रुपैयाँभन्दा बढी बराबरको निर्माण कार्य सम्पन्न भइसकेको उनले जानकारी दिए ।
पार्क निर्माणको योजना र विशाल राष्ट्रिय झण्डाबारे सर्वसाधारणलाई जानकारी गराउने तथा प्रचारप्रसार गर्ने उद्देश्यले झण्डा प्रदर्शन गरिएको हो ।
निर्माणका लागि स्थानीयवासीले श्रमदानसँगै आर्थिक सहयोग जुटाउने अभियानसमेत सञ्चालन गरेका छन् । यसैक्रममा आर्थिक स्रोत संकलन गर्न बन्दीपुर बजारमा देउसीभैलो कार्यक्रम आयोजना गरिएको छ ।
स्थानीय अगुवा बासु पन्तका अनुसार तिहारको सांस्कृतिक परम्परालाई निर्माण अभियानसँग जोड्दै देउसीभैलोबाट संकलित रकम पार्क निर्माणमा खर्च गरिनेछ । स्थानीयवासीको सामूहिक प्रयासबाट पार्कलाई पूर्णता दिने लक्ष्य राखिएको उनले बताए ।
प्राकृतिक सुन्दरता, मौलिक संस्कृति र पुराना बस्तीका कारण बन्दीपुर देशकै चर्चित पर्यटकीय गन्तव्यका रूपमा परिचित छ । पृथ्वी राजमार्ग नजिकै निर्माण हुने विशाल राष्ट्रिय झण्डासहितको पार्कले बन्दीपुरको पर्यटन प्रवर्द्धनमा थप योगदान पुर्याउने स्थानीयको विश्वास छ ।
राजमार्ग हुँदै दैनिक ठूलो सङ्ख्यामा पोखरा र काठमाडौं आवतजावत गर्ने यात्रुलाई पार्कमा केही समय रोकिएर अवलोकन गर्न तथा तस्बिर खिच्न आकर्षित गर्न सकिने अपेक्षा गरिएको छ । यसले बन्दीपुरको पर्यटकीय पहिचानलाई थप विस्तार गर्ने विश्वास स्थानीयवासीले गरेका छन् ।
