वासिङ्टन । अमेरिकी राष्ट्रपति डोनाल्ड ट्रम्पले इरानसँग जारी युद्ध अन्त्य गर्ने दिशामा सकारात्मक प्रगति भइरहेको दाबी गरेका छन्। ह्वाइट हाउसमा कतारका प्रधानमन्त्री तथा विदेशमन्त्री शेख मोहम्मद बिन अब्दुलरहमान बिन जसिम अल थानीसँग सोमबार भएको भेटवार्तापछि उनले युद्ध चाँडै अन्त्य हुने विश्वास व्यक्त गरेका हुन्।
ट्रम्पले पछिल्लो परिस्थितिमा इरानमाथि थप सैन्य कारबाही आवश्यक नदेखिएको बताए। यद्यपि अवस्था परिवर्तन भए अमेरिकी सेना जुनसुकै बेला कारबाहीका लागि तयार रहेको चेतावनी दिँदै उनले इजरायलसहित मध्यपूर्व क्षेत्रलाई इरानबाट उत्पन्न हुन सक्ने खतराबाट सुरक्षित राखिएको दाबी गरे।
यसैबीच, ट्रम्पले सामाजिक सञ्जाल ट्रुथ सोसलमार्फत कतार, साउदी अरेबिया, संयुक्त अरब इमिरेट्स, बहराइन र कुवेतलगायत देशले इरानमाथि जारी अमेरिकी नौसैनिक नाकाबन्दीलाई निरन्तरता दिन समर्थन जनाएको बताएका छन्। उनका अनुसार इरानलाई आणविक हतियार विकास गर्न नदिने विषयमा पनि क्षेत्रीय मुलुकहरू एकमत छन्। उनले यस विषयमा इरानसँग कुनै सम्झौता नहुने स्पष्ट पारेका छन्।
ट्रम्पले ‘अपरेसन आइरन गेट’ मार्फत इरानका स्थलमार्गबाट हुने आपूर्ति तथा आवागमन नियन्त्रण गर्ने प्रयास भइरहेको पनि उल्लेख गरेका छन्।
यद्यपि अमेरिकी विदेशमन्त्री मार्को रुबियोले आइतबार कूटनीतिक प्रयासबाट अपेक्षित प्रगति हुन नसकेको र तत्कालै कुनै महत्त्वपूर्ण सहमति हुने सम्भावना नरहेको बताएका थिए। उता, इरानले आफ्नो आणविक कार्यक्रम शान्तिपूर्ण प्रयोजनका लागि मात्र रहेको दाबी गर्दै आएको छ।
