काठमाडौं । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवाले पार्टीको आधिकारिकतासम्बन्धी विवादमा आर्थिक चलखेल भएको आरोप लगाउँदै सभापति गगनकुमार थापाप्रति प्रश्न उठाएका छन्।
शनिबार काठमाडौंमा आयोजित नेपाली कांग्रेस काठमाडौं जिल्ला समितिको १५औँ नियमित अधिवेशनलाई सम्बोधन गर्दै देउवाले निर्वाचन आयोगको निर्णय प्रक्रियामाथि प्रश्न उठाएका हुन्। निर्वाचन आयुक्तहरूलाई ज्यान मार्ने धम्की दिइएपछि अर्को पक्षको पक्षमा निर्णय गर्नुपरेको भन्ने समाचार सार्वजनिक भएको उल्लेख गर्दै उनले पार्टीको आधिकारिकता आर्थिक प्रभावमा टुंग्याइएको आरोप लगाए।
एक व्यक्तिले १८ करोड रुपैयाँ दिएको भन्ने अभिव्यक्ति सार्वजनिक भएको प्रसंग उल्लेख गर्दै देउवाले पैसाको बलमा पार्टी नै किन्ने प्रयास भएको टिप्पणी गरे। सभापति थापाप्रति लक्षित गर्दै उनले भने, ‘१८ करोडमा पार्टी अरूलाई बेच्नेले कांग्रेस जोगाउन सक्छ ?’
पार्टीको राजनीतिक मूल्य, सिद्धान्त र पहिचान पैसासँग साट्न नसकिने बताउँदै देउवाले आधिकारिकतासम्बन्धी विवादमा निष्पक्ष छानबिन हुनुपर्ने धारणा राखे। आफूले राजनीतिक जीवनमा धेरै कुरा प्राप्त गरिसकेको उल्लेख गर्दै उनले अब पार्टी र देशका लागि योगदान गर्ने समय आएको बताए।
देउवाले पार्टीको आधिकारिकतासम्बन्धी विवादमा अदालतबाट न्याय पाउने विश्वाससमेत व्यक्त गरे। अदालतबाट न्यायपूर्ण निर्णय आउने र कांग्रेसको रुख चुनाव चिह्न कायम रहनेमा आफू आशावादी रहेको उनको भनाइ थियो।
