काठमाडौं । नेपाली काँग्रेसका नेता डा. शशांक कोइरालाले पार्टीभित्र एकअर्कालाई राजनीतिक ‘भिलेन’ बनाउने प्रवृत्तिको अन्त्य गर्नुपर्ने बताएका छन् । उनले गरिबी, अशिक्षा र बेरोजगारी नै काँग्रेसका वास्तविक चुनौती भएकाले त्यसविरुद्ध लड्नुपर्नेमा जोड दिए ।
शनिबार काठमाडौंमा आयोजित नेपाली काँग्रेसको १५औँ जिल्ला अधिवेशनलाई सम्बोधन गर्दै उनले नेता गगन थापाको आलोचना गरेर उनलाई झन् चर्चामा ल्याउने काम भइरहेको बताए । गगनलाई अनावश्यक महत्व दिनुभन्दा पार्टीले सामना गरिरहेका वास्तविक समस्यामा केन्द्रित हुनुपर्ने उनको भनाइ थियो ।
‘हामीले गगन थापालाई यति धेरै महत्व किन दिन्छौँ ? तपाईं जति गाली गर्नुहुन्छ, उनको महत्व त्यति नै बढ्छ । त्यसैले उनको कुरै नगरौँ,’ उनले भने, ‘हाम्रो असली भिलेन गरिबी, अशिक्षा र बेरोजगारी हो । तिनको विरुद्धमा लड्नु नै आजको आवश्यकता हो ।’
डा. कोइरालाले १५औँ महाधिवेशनलाई पार्टीको भविष्य निर्धारण गर्ने ऐतिहासिक अवसरका रूपमा लिन कार्यकर्तालाई आग्रह गरे । अधिवेशनको सफलताका लागि कार्यकर्ताको सक्रिय सहभागिता महत्त्वपूर्ण हुने भन्दै उनले सुरुवाती चरणमा देखिएको उत्साहजनक उपस्थितिले सकारात्मक संकेत गरेको बताए ।
उनले अरूलाई कमजोर देखाएर आफू बलियो बन्न नसकिने उल्लेख गर्दै पार्टीभित्र एकता कायम गर्नुपर्नेमा जोड दिए । पार्टीका कार्यक्रमलाई निरन्तरता दिँदै तल्लो तहदेखि नै संगठन सुदृढ बनाउन सक्रिय हुनुपर्ने उनको भनाइ थियो ।
