काठमाडौं । नेपालमा आगामी डिसेम्बर ४ देखि २१ सम्म आयोजना हुने आईसीसी क्रिकेट विश्वकप छनोट प्लेअफको खेलतालिका सार्वजनिक भएको छ ।
अन्तर्राष्ट्रिय क्रिकेट परिषद् (आईसीसी) ले शुक्रबार सार्वजनिक गरेको तालिकाअनुसार नेपालले प्रतियोगिताको पहिलो खेल डिसेम्बर ४ मा इटलीसँग खेल्नेछ । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने उक्त खेलबाट नेपालको प्रतियोगिता यात्रा सुरु हुनेछ ।
नेपालले दोस्रो खेल डिसेम्बर ६ मा युगान्डासँग खेल्नेछ । त्यसपछि डिसेम्बर १० मा यूएई, १२ मा जर्सी, १४ मा क्यानडा, १८ मा नामिबिया र अन्तिम खेल डिसेम्बर २१ मा कुवेतसँग प्रतिस्पर्धा गर्नेछ ।
विश्वकप छनोट प्लेअफमा नेपालसहित आठ टोली सहभागी हुनेछन् । लिग–२ को पुछारमा रहेका नेपाल, नामिबिया, क्यानडा र यूएईसँगै आईसीसी च्यालेन्ज लिगबाट छनोट भएका इटली, कुवेत, युगान्डा र जर्सीले प्रतियोगितामा प्रतिस्पर्धा गर्नेछन् ।
प्रतियोगितामा सहभागी आठ टोलीले सिंगल राउन्ड रोबिनका आधारमा एकअर्कासँग खेल्नेछन् । लिग चरणको अन्त्यमा शीर्ष चार स्थान हासिल गर्ने टोली सन् २०२७ मा आयोजना हुने एकदिवसीय क्रिकेट विश्वकपको ग्लोबल छनोटमा प्रवेश गर्नेछन् ।
यसअघि नै लिग–२ को शीर्ष चारमा रहेका अमेरिका, स्कटल्यान्ड, नेदरल्यान्ड्स र ओमानले ग्लोबल क्वालिफायरमा स्थान सुरक्षित गरिसकेका छन् । ग्लोबल क्वालिफायरमा कुल १० टोलीबीच प्रतिस्पर्धा हुनेछ ।
