काठमाडौं । मस्तिष्कघातपछि हात लुलो हुने, झमझमाउने र बोली लरबरिने समस्या भोगिरहेकी रुपन्देहीको सैनामैना–७ की हेमकुमारी थापाको काठमाडौं मेडिकल कलेज (केएमसी) मा सफल उपचार भएको छ। ठूलो चिरफार नगरी बेलुन एन्जियोप्लास्टी र स्टेन्ट प्रत्यारोपणमार्फत उपचार गरिएपछि उनी स्वास्थ्यमा सुधारसँगै घर फर्किएकी छन्।
दुई महिनाअघि मस्तिष्कघात भएपछि हेमकुमारीको स्वास्थ्य अवस्था कमजोर बनेको थियो। सामान्य दैनिक काम गर्नसमेत कठिन भएपछि परिवारले उपचारका लागि उनलाई भारत लगेको थियो। त्यहाँ उपचारमा चार लाख भारतीय रुपैयाँ खर्च लाग्ने बताएपछि आफन्तको सल्लाहमा परिवार उनलाई काठमाडौंस्थित केएमसी ल्याएको थियो।
केएमसीमा न्युरो इन्टरभेन्सन विशेषज्ञ डा. अरुण पौडेल र उनको टोलीले परीक्षण गर्दा हेमकुमारीको मस्तिष्कको मुख्य रक्तनलीमध्ये एउटा करिब ९० प्रतिशत साँघुरिएको पत्ता लागेको थियो। चिकित्सकका अनुसार समयमै उपचार नभए उक्त नसा पूर्ण रूपमा बन्द भई गम्भीर पक्षघात हुने जोखिम थियो।
सीटी स्क्यान र सेरेब्रल एन्जियोग्राफीबाट समस्याको पहिचान भएपछि चिकित्सकले क्याथल्याबमा उपचार गरेका थिए। खुट्टाको धमनीबाट मसिनो तार र क्याथेटर मस्तिष्कको प्रभावित रक्तनलीसम्म पुर्याएर बेलुन एन्जियोप्लास्टी गरिएको थियो। त्यसपछि स्टेन्ट राखेर साँघुरिएको रक्तनली फराकिलो बनाइएको डा. पौडेलले बताए।
उपचारपछि करिब एक घण्टामै हेमकुमारीको स्वास्थ्यमा सुधार देखिएको र दुई दिन अस्पतालमा राखेपछि घर पठाइएको चिकित्सकले जानकारी दिए।
उपचारपछि राहत महसुस गरेकी हेमकुमारीले चिकित्सक तथा स्वास्थ्यकर्मीप्रति आभार व्यक्त गरिन्। ‘मेरो रोग निको पार्न मिहिनेत गर्ने डाक्टर, नर्सलगायत सबैलाई धेरै–धेरै धन्यवाद। उहाँहरूले राम्रो उपचार र माया दिनुभयो। म निकै खुसी छु,’ उनले भनिन्।
आमाको उपचार सफल भएपछि छोरी बबिना थापाले पनि केएमसीका चिकित्सक तथा स्वास्थ्यकर्मीप्रति धन्यवाद व्यक्त गरिन्। ठूलो शल्यक्रियाबिना आधुनिक प्रविधिबाट उपचार भएकोमा उनले खुसी व्यक्त गरेकी छन्।
