वीरगञ्ज (पर्सा) – वीरगञ्ज महानगरपालिकाले सार्वजनिक स्थान तथा विद्युत्का खम्बामा अनुमति नलिई राखिएका होर्डिङ बोर्ड, ब्यानर तथा अन्य प्रचार सामग्री हटाउन थालेको छ।
सार्वजनिक सम्पत्तिको संरक्षण, सडक तथा विद्युत् संरचनाको व्यवस्थापन र सहरी सौन्दर्य कायम गर्ने उद्देश्यले महानगरपालिकाले आजदेखि अनधिकृत रूपमा राखिएका प्रचार सामग्री हटाउने अभियान सुरु गरेको हो।
महानगरपालिकाका हरियाली संयोजक प्रकाश खेतानका अनुसार वीरगञ्जका विभिन्न चोक तथा सडकमा रहेका विद्युत्का खम्बामा जथाभावी टाँगिएका निजी क्लिनिक, चिकित्सक तथा विभिन्न व्यवसायका प्रचार सामग्री हटाउन थालिएको छ। उनले सार्वजनिक पोल वा स्थानमा विज्ञापन सामग्री राख्नुअघि महानगरपालिकाबाट आवश्यक अनुमति लिन सम्बन्धित व्यक्ति तथा संस्थालाई आग्रह गरे।
महानगरपालिकाको अभियानअन्तर्गत मुख्य सडक, चोक तथा विद्युत्का खम्बामा अनुमति नलिई राखिएका प्रचार सामग्री हटाउने कार्यलाई तीव्रता दिइएको छ।
“महानगरलाई स्वच्छ, सुन्दर र व्यवस्थित बनाउने दायित्व हामी सबैको हो। सार्वजनिक सम्पत्तिको दुरुपयोग गरी सहरी सौन्दर्य बिगार्ने र अनुमतिविना विज्ञापन राख्ने छुट कसैलाई छैन,” संयोजक खेतानले भने।
महानगरपालिकाले सार्वजनिक स्थानमा अनुमति नलिई होर्डिङ बोर्ड, ब्यानर तथा अन्य प्रचार सामग्री नराख्न सम्बन्धित व्यक्ति तथा संस्थालाई अनुरोध गरेको छ।
यसैबीच, वीरगञ्जको मुख्य सडकलाई आगामी दसैँअघि पूर्णरूपमा सफा र व्यवस्थित बनाउने उद्देश्यले सडक डिभिजन कार्यालय हेटौँडाले त्रिभुवन राजपथअन्तर्गत गण्डक चोकदेखि मितेरीपुलसम्म सडक विस्तारको काम अघि बढाएको छ। सडकको दायाँ–बायाँ २५–२५ मिटर क्षेत्र कायम गर्ने योजनाअनुसार उक्त सडकखण्डमा पर्ने घर तथा संरचना भत्काउने काम सम्पन्न भएको छ।
