काठमाडौँ । युइएफए नेसन्स लिगअन्तर्गत समूह ‘सी’को खेलमा स्पेनले क्रोएसियामाथि ४–१ को सहज जित निकालेको छ।
सेभियास्थित रामोन सान्चेज पिजहुआन रंगशालामा भएको खेलमा स्पेनका लागि लामिन यामालले दुई गोल गरे। मार्क पुबिल र निको विलियम्सले समान एक गोल थपे। क्रोएसियाका डियन ड्रेना बेलजोले एक गोल गरे पनि त्यो टोलीको हार टार्न पर्याप्त भएन।
खेलको दोस्रो मिनेटमै यामालले गोल गर्दै स्पेनलाई अग्रता दिलाएका थिए। २८औँ मिनेटमा बेलजोले गोल गर्दै क्रोएसियालाई खेलमा फर्काएपछि पहिलो हाफ १–१ को बराबरीतर्फ अघि बढेको थियो।
तर त्यसको तीन मिनेटपछि नै स्पेनले पुनः अग्रता लियो। ३१औँ मिनेटमा यामालको पासमा पुबिलले गोल गर्दै स्पेनलाई २–१ को स्थितिमा पुर्याए।
दोस्रो हाफमा पनि स्पेनले आक्रमणलाई निरन्तरता दियो। ६३औँ मिनेटमा यामालले व्यक्तिगत दोस्रो गोल गरेपछि स्पेन ३–१ ले अघि बढ्यो। निर्धारित समय सकिन एक मिनेट बाँकी रहँदा निको विलियम्सले गोल गरेपछि स्पेनले ४–१ को फराकिलो जित सुनिश्चित गर्यो।
यस जितसँगै स्पेनले ६ अंक जोड्दै समूह ‘सी’को शीर्ष स्थानमा रहेको छ भने क्रोएसिया तेस्रो स्थानमा छ। स्पेनको यो लगातार ४०औँ खेलमा अपराजित यात्रा हो।
