काठमाडौं । नेपाल क्रिकेट संघ (क्यान)ले आईसीसी क्रिकेट विश्वकप लिग–२ अन्तर्गत ओमानमा हुने त्रिकोणात्मक शृङ्खला खेल्न जाने नेपाली राष्ट्रिय क्रिकेट टोलीको बिदाइ गरेको छ । क्यानले आइतबार कार्यक्रम आयोजना गरी कप्तान सन्दीप लामिछानेसहितको टोलीलाई ओमानका लागि बिदाइ गरेको हो ।
नेपाल क्रिकेट संघका अध्यक्ष चतुरबहादुर चन्द, सचिव पारस खड्का, उपाध्यक्ष राेशनबहादुर सिंह, क्रिकेट व्यवस्थापक विनाेद दास लगायतले टाेलीलाई बिदाइ गरेका हुन् ।
एकदिवसीय क्रिकेट टाेलीका कप्तान सन्दीप लामिछानेले पहिलाे लक्ष्य नै एकदिवसीय मान्यता जाेगाउने रहेकाे बताएका छन् । ओमानकाे पछिल्लो खेलकाे तथ्यांक राम्रो रहेकाले आशावादी रहेकाे बताए ।
ओमानमा नेपाल, घरेलु टोली ओमान र क्यानडाबीच लिग–२ को शृङ्खला अक्टोबर ७ देखि सुरु हुँदैछ । नेपालले शृङ्खलामा चार खेल खेल्नेछ । नेपालले अक्टोबर ११ र १७ मा क्यानडासँग तथा अक्टोबर १३ र १९ मा ओमानसँग प्रतिस्पर्धा गर्ने तालिका छ ।
यो शृङ्खला नेपालका लागि लिग–२ को नियमित खेल मात्र नभई विश्वकप छनोटको सम्भावना र एकदिवसीय अन्तर्राष्ट्रिय (ओडीआई) हैसियत जोगाउने दृष्टिले समेत महत्त्वपूर्ण बनेको छ ।
लिग–२ मा ३२ खेल खेलिसकेको नेपाल ११ जित, १९ हार र दुई खेल नतिजाविहीन हुँदै २४ अंकसहित आठ टोलीमध्ये सातौँ स्थानमा छ । नेपालभन्दा एक स्थानमाथि रहेको क्यानडाको २५ अंक छ भने ओमान ३१ अंकसहित चौथो स्थानमा छ । त्यसैले ओमान भ्रमणका चार खेल नेपालका लागि अंक तालिकामा सुधार गर्ने अन्तिम अवसरका रूपमा रहेको छ ।
नेपालले यसअघि घरेलु मैदानमा भएको लिग–२ शृङ्खलामा उत्कृष्ट प्रदर्शन गर्दै ८ मध्ये ६ खेल जितेको थियो । तर पछिल्ला विदेशी शृङ्खलामा अपेक्षाअनुसार प्रदर्शन गर्न नसक्दा नेपालको अवस्था फेरि दबाबमा परेको छ । लिग–२ मा नेपालले विदेशी मैदानमा खेलेका १८ मध्ये १२ खेल गुमाइसकेको तथ्यले पनि ओमान भ्रमणको चुनौती देखाउँछ ।
ओमान भ्रमणका लागि यसअघि नै क्यानले १५ सदस्यीय टोली घोषणा गरेको छ । टोलीमा सन्दीपसँगै आसिफ शेख, दीपेन्द्रसिंह ऐरी, देव खनाल, इशान पाण्डे, रोहित पौडेल, अर्जुन कुमाल, सन्दीप जोरा छन् । त्यस्तै गुल्शन झा, बसिर अहमद, करण केसी, नन्दन यादव, ललित राजवंशी, शाहब आलम र शेर मल्ल टोलीमा छन् ।
नेपालले यसपटक ओमान र क्यानडासँग आफ्नो अन्तिम चार खेल खेल्दैछ । त्यसैले टोलीसामु अब ओमानमा अंक बटुल्दै लिग–२ अभियानलाई सुखद निष्कर्ष दिने चुनौती छ ।
