काठमाडौं। राष्ट्रिय स्वतन्त्र पार्टीकी सांसद रचना खतिवडाले शहीद परिवार र आफ्नो छोराको बलिदानमाथि राजनीतिक टिप्पणी नगर्न आग्रह गरेकी छन्। मंगलबार प्रतिनिधिसभा बैठकमा बोल्दै उनले आफू पदको लोभमा नभई शहीद परिवारको न्याय र देश सुधारका लागि संसद्मा आएको बताइन्।
आफूलाई ‘छोराको लाशसँग सांसद पद साटेको’ भन्ने टिप्पणीप्रति आपत्ति जनाउँदै खतिवडाले आफ्नो राजनीतिक यात्रा जेन–जी आन्दोलनका क्रममा ज्यान गुमाएका युवाको न्यायका लागि भएको दाबी गरिन्।
‘मेरो काख रितिएको छ, संसार उजडिएको छ। यदि कसैले मेरो छोरालाई जिउँदो ल्याएर मेरो काखमा राखिदिन्छ भने म अहिले नै सांसद पद त्याग्न तयार छु। म कुनै माफिया बन्न वा जनतालाई उचालेर लडाउन आएकी होइन। म त एउटी सहिदकी आमा हुँ, जो आफ्नो छोरा जस्ता अरू छोराहरू नमरिउन् भनेर खबरदारी गर्न आएकी हुँ,’ उनले भनिन्।
खतिवडाले न्याय नपाएसम्म खबरदारी जारी राख्ने र न्याय प्राप्त भएको दिन सांसद पदबाट राजीनामा दिन एक सेकेन्ड पनि नहिचकिचाउने बताइन्।
उनले बन्दी बनाइएका आन्दोलनकारीलाई रिहा गर्न, घाइतेको निःशुल्क उपचार गर्न तथा शहीद परिवारले चित्त बुझ्ने गरी न्याय निरूपण गर्न सरकारको ध्यानाकर्षण गराइन्।
