काठमाडौं। नेकपा एमालेका सचिव महेश बस्नेतले ‘द ग्रे जोन’ रिपोर्टमा नाम जोडिएका व्यक्तिहरूले रिपोर्ट गलत भए खण्डन गर्नुपर्ने र त्यसमा उठाइएका प्रश्नको जवाफ दिनुपर्ने बताएका छन् ।
आइतबार पार्टी केन्द्रीय कार्यालय च्यासलमा निर्वाचन समीक्षा तथा पुनर्गठन कार्यदलको बैठकपछि सञ्चारकर्मीसँग कुरा गर्दै बस्नेतले रिपोर्टबारे व्याख्या गरेको आरोपमा भरत दाहाल पक्राउ परेको विषयले थप प्रश्न जन्माएको बताए ।
‘ग्रे जोनको रिपोर्ट गलत भए सम्बन्धित पक्षले त्यसबारे स्पष्ट पार्नुपर्छ,’ बस्नेतले भने, ‘रिपोर्टमा नाम जोडिएका व्यक्तिहरूले त्यसको जवाफ दिनुपर्छ।’
रिपोर्टमा प्रधानमन्त्री बालेन्द्र साह, राष्ट्रिय स्वतन्त्र पार्टीका सभापति रवि लामिछाने, गृहमन्त्री सुदन गुरुङ र सांसद रञ्जु दर्शनालगायतका नाम जोडिएको दाबी गर्दै बस्नेतले उनीहरूले यसबारे गम्भीर रूपमा स्पष्ट पार्नुपर्ने बताए । रिपोर्टले २३–२४ गतेका घटनाबारे समेत प्रश्न उठाएको उल्लेख गर्दै उनले ती घटनामा विदेशी शक्तिको भूमिका भए–नभएकोबारे निष्पक्ष अनुसन्धान हुनुपर्ने बताए ।
सिंहदरबार, सर्वोच्च अदालत र संसद्जस्ता राज्यका महत्वपूर्ण संरचनामाथि भएको क्षति तथा हिंसात्मक गतिविधिको अनुसन्धान गरी दोषी प्रमाणित हुनेमाथि कानुनअनुसार कारबाही गर्नुपर्ने उनको भनाइ छ ।
बस्नेतले संविधान संशोधनका नाममा गणतन्त्र, संघीयता र समावेशी लोकतन्त्र कमजोर पार्ने वा हटाउने कुरा स्वीकार्य नहुने बताए । संघीयतालाई कम खर्चिलो र प्रभावकारी बनाउने विषयमा भने छलफल गर्न सकिने उनले बताए ।
महिला, दलित, आदिवासी जनजाति, मधेसीलगायत समुदायको समावेशी प्रतिनिधित्व सुनिश्चित गर्ने संवैधानिक व्यवस्थालाई कमजोर पार्न नहुने उनको भनाइ छ । दुई सदनात्मक संसद्, संघीयता र समावेशी लोकतन्त्र संविधानका महत्वपूर्ण आधार भएको उल्लेख गर्दै उनले राजतन्त्र पुनःस्थापना वा धर्मनिरपेक्षता हटाउने विषयमा एमाले सहमत नरहेको बताए ।
वर्तमान सरकारले संविधान संशोधनका नाममा मुलुकलाई प्रतिगमनतर्फ लैजान खोजेको हो कि भन्ने आशंका रहेको बस्नेतले बताए । राष्ट्रिय सभाको भूमिका कमजोर पार्ने प्रयास स्वीकार्य नहुने भन्दै उनले दुई सदनात्मक व्यवस्थाबाट पछि हट्न नसकिने बताए ।
संविधान दिवसका अवसरमा राष्ट्रपतिले आयोजना गरेको चियापानमा एमालेका नेता सहभागी भए वा नभएको आधारमा पार्टीको संविधानप्रतिको प्रतिबद्धता मूल्यांकन गर्न नमिल्ने उनको भनाइ थियो । संविधान निर्माणमा एमालेको महत्वपूर्ण भूमिका रहेको दाबी गर्दै बस्नेतले केन्द्रीय कमिटी बैठकपछि पार्टी थप एकताबद्ध भएर वर्तमान सरकारका गतिविधिविरुद्ध सशक्त कार्यक्रमसहित अघि बढ्ने बताए ।
