काठमाडौं । ग्यास अभावको समस्या समाधानका लागि सरकारले पहल नगरेको भन्दै अखिल (क्रान्तिकारी)मा आबद्ध विद्यार्थीले काठमाडौंको रत्न राज्यलक्ष्मी क्याम्पसको गेटबाहिर दाउराको चुल्होमा खाना पकाएर सांकेतिक विरोध गरेका छन् ।
ग्यास आपूर्तिमा सहजता ल्याउन सरकारमाथि दबाब बढाउने उद्देश्यले विद्यार्थीले सडकमै खाना पकाएर खाएका हुन् । विद्यार्थी नेता निरज श्रेष्ठले ग्यास अभावका कारण दुई हप्तादेखि घरमा खाना पकाउन नसकेको बताए ।
‘लाठी हान्ने काम नगरी कि त खानाको व्यवस्था गर, नभए ग्यास सिलिन्डरको व्यवस्था गर,’ श्रेष्ठले भने ।
उनले सरकारले व्यापारीसँग प्रभावकारी समन्वय र सहजीकरण गरी ग्यास वितरण सहज बनाउनुपर्ने बताए । बजारमा कालोबजारी भइरहेको भए अनुगमन गरी दोषी व्यापारीलाई कानुनी कारबाही गर्नुपर्ने उनको माग छ ।
ग्यासको सहज उपलब्धताको माग गर्दै अखिल क्रान्तिकारीले देशभरका क्याम्पसमा शान्तिपूर्ण आन्दोलनका कार्यक्रम गरिरहेको श्रेष्ठले बताए ।
