काठमाडौं । नेपाल भलिबल लिग (एनभीएल) मा अन्नपूर्ण स्पाइकर किङ्ग्सले तेस्रो जित दर्ता गरेको छ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बुधबार भएको खेलमा अन्नपूर्णले खप्तड फाल्कन्स सुदूरपश्चिमलाई ३–० को सोझो सेटमा पराजित गरेको हो।
अन्नपूर्णले पहिलो र दोस्रो सेट समान २५–१५ ले जित्दा तेस्रो सेटमा २९–२७ को रोमाञ्चक जित निकाल्यो।
यस जितसँगै चार खेलबाट तीन जित हात पारेको अन्नपूर्णले ९ अंक जोड्दै तालिकाको शीर्ष स्थानमा उक्लिएको छ। यता, खप्तड फाल्कन्सको भने यो लगातार चौथो हार हो। अंकविहीन खप्तड तालिकाको पुछारमा छ।
एनभीएलअन्तर्गत बुधबार साँझ ७ बजे कर्णाली शिवराज र काठमाडौं रेड्सबीच प्रतिस्पर्धा हुँदैछ। कर्णाली तीन खेलबाट ८ अंकसहित तालिकाको शीर्ष स्थानमा छ भने काठमाडौं रेड्स समान तीन खेलबाट ५ अंक जोड्दै चौथो स्थानमा रहेको छ।
