काठमाडौं। नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहालले राजनीतिक नेतृत्व, कर्मचारीतन्त्र र राज्यका विभिन्न निकाय अन्योलपूर्ण अवस्थामा रहेको बताएका छन् । वर्तमान सरकारको कार्यशैलीप्रति टिप्पणी गर्दै उनले सरकारका राम्रा काममा सहयोग र समर्थन गर्ने तथा नराम्रा कामको आलोचना र विरोध गर्ने आफ्नो नीति रहेको बताए ।
शनिबार काठमाडौंमा आयोजित कार्यक्रममा दाहालले पछिल्लो राजनीतिक परिस्थितिप्रति चिन्ता व्यक्त गर्दै राजनीतिक नेतृत्व, कर्मचारीतन्त्र, नागरिक समाज र सचेत नागरिकलाई राष्ट्र तथा जनताप्रति थप गम्भीर र जिम्मेवार भएर काम गर्न आग्रह गरे ।
‘अहिले कता–कता नेपाली राजनीति पनि, नेपाली कर्मचारीतन्त्र पनि र सबै राज्यका निकायहरू अलि बढी अन्योलमा भएको देखिन्छ,’ उनले भने, ‘तर लक्षण राम्रो देखिएको छैन ।’
उनले मुलुकको स्वतन्त्रता, स्वाधीनता र भौगोलिक अखण्डतालाई सर्वोपरी राख्दै लामो संघर्षबाट प्राप्त लोकतन्त्र र स्वतन्त्रताको रक्षामा सबै पक्ष एकजुट हुनुपर्ने बताए । राज्यका हरेक क्षेत्रमा जिम्मेवार निकाय र सचेत नागरिकले राष्ट्रिय हितलाई केन्द्रमा राखेर काम गर्नुपर्ने उनको भनाइ थियो ।
