काठमाडौं । एलेजान्डर इसाकले पहिलो १० मिनेटमै दुई गोल गरेपछि लिभरपुलले प्रिमियर लिगमा इप्स्वीच टाउनलाई २–० ले पराजित गरेको छ ।
नयाँ सिजनमा लगातार दुई खेल बराबरीमा रोकिएको लिभरपुलले शुक्रबार पहिलो जित दर्ता गरेको हो । यो जित नयाँ प्रशिक्षक एन्डोनी इराओलाका लागि पनि प्रिमियर लिगमा पहिलो जित बनेको छ ।
गत वर्ष कीर्तिमानी १२ करोड ५० लाख पाउन्डमा लिभरपुलमा आबद्ध भएका स्वीडेनका अन्तर्राष्ट्रिय खेलाडी इसाकले खेलको छैटौँ र नवौँ मिनेटमा गोल गरेका थिए । दुवै गोलका लागि कोडी गाक्पोले असिस्ट गरेका थिए ।
खेलमा ब्राडली बारकोलाले पनि लिभरपुलबाट डेब्यु गरे । उनी ६४औँ मिनेटमा भिक्सटर मुनोजको स्थानमा मैदान प्रवेश गरेका थिए ।
यसअघि लिभरपुलले नयाँ सिजनमा न्युकासल युनाइटेड र नटिङ्घम फरेस्टसँग बराबरी खेलेको थियो । तीन खेलबाट पाँच अंक जोडेको लिभरपुल तालिकाको पाँचौँ स्थानमा उक्लिएको छ ।
इप्स्वीच टाउनको भने यो सिजन दोस्रो हार हो । तीन खेलबाट तीन अंक जोडेको इप्स्वीच १३औँ स्थानमा छ ।
