नारायणगढ । भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिहीन दलित, सुकुमवासी तथा अव्यवस्थित बसोबासीको समस्या समाधान गर्न आवश्यक जनशक्ति थप गरी लालपुर्जा वितरण प्रक्रियालाई तीव्रता दिने बताएकी छन् ।
चितवनका सबै स्थानीय तहका प्रमुख प्रशासकीय अधिकृत, सरोकारवाला तथा भूमि समस्या समाधान समितिका अधिकारीसँग छलफल गर्दै मन्त्री रावलले लालपुर्जा वितरणका लागि आवश्यक जनशक्ति व्यवस्थापन गरिने बताएकी हुन् ।
उनले सरोकारवालाबाट प्राप्त सुझावका आधारमा भूमि समस्या समाधानको कामलाई तीव्र गतिमा अघि बढाउने विषयमा छलफल गरिएको जानकारी दिइन् ।
‘नियम र नीतिका कारण काम रोक्ने वा बाधा–अड्चन हुने अवस्था छैन । जिम्मेवारीमा रहनुभएका व्यक्तिले कति छिटो अगाडि बढाउनुहुन्छ भन्ने विषय नियतमा भर पर्छ,’ उनले भनिन् ।
मन्त्री रावलले लालपुर्जा वितरण प्रक्रियालाई प्रभावकारी र छरितो बनाउन जिल्ला समितिलाई आवश्यक सुझाव दिन आग्रह गरिएको बताइन् ।
उनले सहकारीपीडित तथा भूमिहीन नागरिकसँग प्रत्यक्ष संवाद गरी उनीहरूका समस्या, गुनासा र मागबारे जानकारी लिएको पनि उल्लेख गरिन् । साथै, सरकारले भूमि समस्या समाधान तथा सहकारीपीडितका सवालमा गरिरहेका कामबारे स्थानीय नागरिकलाई जानकारी गराइएको उनले बताइन् ।
