काठमाडौँ । वैदिक सनातन धर्मावलम्बीहरूले भगवान् श्रीकृष्णको जन्मदिनका रूपमा मनाउने श्रीकृष्णजन्माष्टमी पर्व आज देशभर विभिन्न धार्मिक कार्यक्रमसहित मनाउँदैछन् । भक्तजनहरूले कृष्णमन्दिरमा पूजाआराधना, भजनकीर्तन तथा प्रवचन गर्दै श्रद्धा–भक्तिपूर्वक पर्व मनाइरहेका छन् ।
पौराणिक मान्यताअनुसार द्वापरयुगमा भाद्रकृष्ण अष्टमीको मध्यरातमा भगवान् श्रीकृष्णको जन्म भएको थियो । यही कारण यस दिनलाई श्रीकृष्णजन्माष्टमी र रातलाई ‘मोहरात्रि’ भनिन्छ । पर्वका अवसरमा महिला तथा पुरुष भक्तजनहरू व्रत बसेर रातभर जाग्राम बस्ने परम्परा छ ।
अन्याय, अत्याचार र अधर्मको अन्त्य गर्दै मानव समुदायलाई सत्य तथा सत्कर्मको बाटोमा अघि बढ्न प्रेरणा दिएका श्रीकृष्णलाई भगवान् विष्णुको आठौँ अवतारका रूपमा हिन्दु धर्मावलम्बीहरूले पूजा गर्ने गर्छन् ।
कुरुक्षेत्रको युद्धमा अर्जुनलाई श्रीकृष्णले दिएको उपदेशलाई समेटिएको श्रीमद्भागवतगीता हिन्दु धर्मको महत्वपूर्ण धार्मिक ग्रन्थका रूपमा मानिन्छ । छोटकरीमा ‘गीता’ भनेर चिनिने यो ग्रन्थ विश्वका विभिन्न भाषामा अनुवाद भएको छ ।
पौराणिक कथाअनुसार बाल्यकालदेखि नै विभिन्न लीला देखाएका श्रीकृष्णले पुतना, कंश, जरासन्ध र शिशुपालजस्ता दानवी प्रवृत्तिको अन्त्य गरेका थिए ।
श्रीकृष्णजन्माष्टमीका अवसरमा आज ललितपुरको मङ्गलबजारस्थित प्रसिद्ध कृष्णमन्दिरमा विशेष मेला लाग्दैछ । यस्तै, काठमाडौँको कागेश्वरी मनोहरा नगरपालिकास्थित नवतनधामलगायत राजधानीका विभिन्न कृष्णमन्दिरमा पनि भक्तजनको उल्लेख्य भीड लाग्ने गर्दछ ।
पर्वका अवसरमा विभिन्न धार्मिक सङ्घसंस्थाले श्रीकृष्णको झाँकीसहित शोभायात्रा तथा रथयात्रासमेत निकाल्ने गरेका छन् । सरकारले श्रीकृष्णजन्माष्टमीका अवसरमा आज सार्वजनिक बिदा दिएको छ ।
