रसुवा । भोटेकोशी नदीमा गत भदौ १० गते आएको विनाशकारी बाढीका कारण पाँच दिनदेखि जिल्लाभर विद्युत् सेवा अवरुद्ध भएपछि जिल्ला सदरमुकाम धुन्चेमा मोबाइल फोन चार्ज गर्न जेनेरेटरको व्यवस्था गरिएको छ।
रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घ (आईएफआरसी)को सहयोगमा नेपाल रेडक्रस सोसाइटीले धुन्चेमा जेनेरेटर ल्याएर निःशुल्क मोबाइल चार्ज गर्ने व्यवस्था मिलाएको हो।
विद्युत् सेवा अवरुद्ध भएपछि स्थानीयवासी, बाढी प्रभावित तथा धुन्चे पुगेका तीर्थालुहरू आफन्त र बाहिरी संसारसँग सम्पर्कविहीन बनेका थिए। समस्या समाधानका लागि नेपाल रेडक्रस सोसाइटी रसुवा शाखा र तिलगङ्गा आँखा केन्द्रको संयुक्त पहलमा जेनेरेटर ल्याइएको हो।
जेनेरेटर सञ्चालनमा आएपछि एकैपटक १०० भन्दा बढीले मोबाइल चार्ज गरिरहेको नेपाल रेडक्रसले जनाएको छ। मोबाइल चार्ज गर्न पाउँदा बाढी प्रभावित तथा जिल्लावासीले टाढा रहेका आफन्तलाई आफू सुरक्षित रहेको जानकारी गराउन सहज भएको छ।
धुन्चेमा निःशुल्क मोबाइल चार्ज गर्ने सुविधा पाएपछि स्थानीयवासी तथा बाहिरबाट आएका सेवाग्राहीले पुनः आफन्तसँग सम्पर्क स्थापित गर्न सकेका छन्। एक सेवाग्राहीले भने, “फोनकलले टुटेको आशालाई जोडेको छ, चिन्ताले भरिएका मनलाई सान्त्वना दिएको छ।”
बाढीका कारण अवरुद्ध विद्युत् सेवा पुनः सञ्चालन गर्न प्राविधिक टोली परिचालन गरिएको छ। विद्युत् सेवा यथाशीघ्र सञ्चालनमा ल्याउन आवश्यक पहल भइरहेको जनाइएको छ।
