काठमाडौं । एनसेलले बाढी प्रभावित क्षेत्रमा सञ्चार सम्पर्क, खोज तथा उद्धार र राहत वितरणलाई सहज बनाउन उपलब्ध गराउँदै आएको निःशुल्क भ्वाइस, डेटा र एसएमएस सेवा थप एक साताका लागि विस्तार गरेको छ।
कम्पनीका अनुसार शनिबारदेखि लागू हुने गरी प्रभावित क्षेत्रमा थप सात दिनसम्म यी सेवा निःशुल्क उपलब्ध हुनेछन्।
यसअघि रसुवाको भोटेकोशी नदीमा आएको भीषण बाढीपछि एनसेलले प्रभावित क्षेत्रमा तीन दिनसम्म निःशुल्क डेटा, अलनेट भ्वाइस र १०० वटा एसएमएस उपलब्ध गराउने घोषणा गरेको थियो। सोहीअनुसार सेवा प्रदान गरिँदै आएकोमा कम्पनीले अब यसको अवधि थप गरेको हो।
विपद्को समयमा सूचना आदानप्रदान, समन्वय, खोज तथा उद्धार र राहत वितरणलाई प्रभावकारी बनाउन सञ्चार सेवाको महत्वपूर्ण भूमिका रहने एनसेलले जनाएको छ। प्रभावित नागरिकलाई परिवार तथा आफन्तसँग सम्पर्कमा रहन र उद्धार तथा राहतमा खटिएका टोलीसँग समन्वय गर्न सहज होस् भन्ने उद्देश्यले सेवा विस्तार गरिएको कम्पनीको भनाइ छ।
एनसेलका चीफ कन्जुमर बिजनेस अफिसर उपाङ्ग दत्ताले विपद्को कठिन समयमा प्रभावित समुदायलाई आवश्यक सञ्चार सुविधा उपलब्ध गराउनु कम्पनीको जिम्मेवारी भएको बताए।
१८ वटा टावर सञ्चालनमा
बाढीका कारण प्रभावित क्षेत्रमा अवरुद्ध भएका एनसेलका १८ वटा मोबाइल टावर पुनः सञ्चालनमा ल्याइएको कम्पनीले जनाएको छ। थप ९ वटा प्रभावित टावर सञ्चालनमा ल्याउन काम भइरहेको छ।
यसैबीच, खोज, उद्धार, राहत तथा पुनर्स्थापना कार्यमा सहयोग पुर्याउने उद्देश्यले एनसेल फाउन्डेसनमार्फत प्रधानमन्त्री दैवी प्रकोप उद्धार कोषमा बिहीबार १ करोड रुपैयाँ सहयोग गरिएको छ।
एनसेलले बाढी प्रभावित क्षेत्रका नागरिकलाई सुरक्षित रहन सम्बन्धित निकायले जारी गरेका सुरक्षा निर्देशन पालना गर्न आग्रह गरेको छ। कम्पनीले एसएमएस तथा सामाजिक सञ्जालमार्फत प्रभावित समुदायलाई आवश्यक सूचना पनि निरन्तर सम्प्रेषण गर्दै आएको जनाएको छ।
