काठमाडौँ। चीनको सिजाङ (तिब्बत) स्वायत्त क्षेत्रको केरुङ (ग्याइरोङ) काउन्टीबाट दृश्य कैद गरिरहेका एक पर्यटकको क्यामरामा नेपालतर्फको उच्च हिमाली क्षेत्रमा भएको हिमनदी पहिरो (ग्लेसियर कोल्याप्स) कैद भएको तथ्य बाहिरिएको छ ।
चिनियाँ एकेडेमी अफ साइन्सेजअन्तर्गतको इन्स्टिच्युट अफ माउन्टेन हाजार्डस् एन्ड इन्भायरोन्मेन्टका निर्देशक काङ सिचाङले भिडियोमा देखिएको हिमनदी पहिरोको स्थान रिमोट सेन्सिङबाट प्राप्त उपग्रह तस्बिरसँग मेल खाएको पुष्टि गरेका छन् ।
विज्ञहरूका अनुसार उक्त हिमनदी पहिरोकै कारण केरुङ नाकातर्फ लेदोसहितको ठूलो बाढी आएको हो । पर्यटकले खिचेको भिडियोमा देखिएको हिमनदीको क्षय नै केरुङ बन्दरगाहमा आएको बाढीको मुख्य कारण रहेको अधिकारीहरूले बताएका छन् ।
