काठमाडौं । सुनसरीको देवानगञ्ज गाउँपालिका–३, कप्तानगञ्ज घटनामा उपचारका क्रममा मृत्यु भएका २२ वर्षीय रविन्द्र मेहताका परिवार र गृहमन्त्री सुधन गुरुङबीच वार्ता सुरु भएको छ।
महाराजगञ्जस्थित त्रिभुवन विश्वविद्यालय शिक्षण अस्पतालमा जारी वार्तामा मेहता परिवारका सदस्य तथा सरकारी पक्ष सहभागी छन्।
साउन १० गते राति कप्तानगञ्जमा भएको घटनामा घाइते भएका मेहताको उपचारका क्रममा मंगलबार निधन भएको थियो। उनको मृत्युपछि परिवारसँग संवादका लागि गृहमन्त्री स्वयं अस्पताल पुगेका हुन्।
यसअघि मंगलबार नै गृहमन्त्री गुरुङले हिन्दु र मुस्लिम समुदायका नेताहरूसँग गृहमन्त्रालयमा छुट्टाछुट्टै छलफल गरेका थिए। छलफलमा दुवै समुदायका विभिन्न प्रतिनिधिहरू सहभागी थिए।
गृहमन्त्रीको सचिवालयका अनुसार पछिल्ला दिनमा मुलुकका विभिन्न क्षेत्रमा देखिएको तनाव, विवाद, शान्ति–सुरक्षा र समुदायबीचको आपसी सद्भाव कायम गर्ने विषयमा छलफल केन्द्रित भएको थियो।
