काठमाडौं । साताको कारोबारको चौथो दिन बिहीबार नेपाल स्टक एक्सचेञ्ज (नेप्से) परिसूचक सकारात्मक अंकले बन्द भएको छ। दिनभर उतारचढावपूर्ण कारोबार भए पनि अन्तिम एक घण्टामा खरिदकर्ताको सक्रियता बढेपछि बजारमा सुधार देखिएको हो।
आज नेप्से परिसूचक १४.१७ अंकले बढेर २,७२६.७२ विन्दुमा पुगेको छ। कारोबार सुरु भएदेखि नै बजारमा उतारचढाव कायम रहे पनि दिउँसोपछि बजारले गति लिँदै अन्त्यमा हरियाली कायम गर्न सफल भएको हो।
बिहीबार ३३८ कम्पनीका १ करोड ७७ हजार कित्ता शेयर किनबेच हुँदा कुल ४ अर्ब ६९ करोड ३४ लाख रुपैयाँ बराबरको कारोबार भएको नेप्सेले जनाएको छ।
कारोबार भएका कम्पनीमध्ये १५३ कम्पनीको शेयर मूल्य बढेको छ भने १११ कम्पनीको मूल्य घटेको छ। १२ कम्पनीको शेयर मूल्य भने स्थिर रहेको छ।
आज सबैभन्दा धेरै मूल्य बढ्ने कम्पनीमा एभरेष्ट कलर लिमिटेड रहेको छ, जसको शेयर मूल्य १४.९९ प्रतिशतले वृद्धि भएको छ। त्यसपछि स्नो रिभर लिमिटेडको शेयर १३.७१ प्रतिशत र एपोलो हाइड्रोपावरको शेयर ११.०४ प्रतिशतले बढेको छ।
कारोबार रकमका आधारमा रिलायन्स स्पिनिङ मिल्स शीर्ष स्थानमा रहँदै २८ करोड ३३ लाख १९ हजार रुपैयाँ बराबरको कारोबार गरेको छ। त्यसपछि आँखुखोला जलविद्युत्, रिडी हाइड्रोपावर, सोलु हाइड्रोपावर र एनआरएन इन्फास्ट्रक्चर सर्वाधिक कारोबार हुने कम्पनीहरूको सूचीमा परेका छन्।
