अटलान्टा- विश्वकप फुटबल २०२६ को अन्तिम १६ मा अर्जेन्टिनासँग ३–२ ले पराजित हुँदै प्रतियोगिताबाट बाहिरिएको इजिप्टले खेलको रेफ्री टोलीविरुद्ध अन्तर्राष्ट्रिय फुटबल महासङ्घ (फिफा) समक्ष औपचारिक उजुरी दर्ता गरेको छ।
इजिप्ट फुटबल सङ्घले बुधबार जारी गरेको विज्ञप्तिमा फ्रान्सेली रेफ्री फ्रान्कोइस लेटेक्सियर तथा भिडियो सहायक रेफ्री (भीएआर) टोलीबाट गम्भीर निर्णयगत त्रुटि भएको आरोप लगाएको छ। सङ्घले उनीहरूमाथि छानबिन गरी प्रतियोगिताबाट हटाउन फिफासँग माग गरेको जनाएको छ।
उक्त खेलमा इजिप्ट १–० ले अग्रता लिइरहेका बेला मोस्ताफा जिकोले गरेको गोल भीएआरको सिफारिसपछि अमान्य घोषित गरिएको थियो। रेफ्रीले गोल हुनुअघि अर्जेन्टिनाका लिसान्द्रो मार्टिनेजमाथि फाउल भएको निष्कर्ष निकाल्दै आफ्नो प्रारम्भिक निर्णय परिवर्तन गरेका थिए।
इजिप्टले भने अर्जेन्टिनाका एन्जो फर्नान्डेजले निर्णायक गोल गर्नु अघि एलेक्सिस म्याक एलिस्टरले हम्दी फाथीमाथि फाउल गरेको दाबी गरेको छ। उक्त घटनामा आफूहरूले पेनाल्टी पाउनुपर्ने भए पनि रेफ्रीले त्यसलाई बेवास्ता गरेको सङ्घको आरोप छ।
साथै, खेलका केही महत्त्वपूर्ण भिडियो फुटेजको समीक्षा गर्न अस्वीकार गरिएको आरोप पनि इजिप्टले लगाएको छ। ती फुटेजले आफ्नो वैध गोल र पेनाल्टीको दाबी पुष्टि गर्ने विश्वास सङ्घले व्यक्त गरेको छ।
खेलपछि इजिप्टका मुख्य प्रशिक्षक होसाम हसनले पनि रेफ्रीको निर्णयप्रति असन्तुष्टि जनाउँदै आफ्नो टोलीसँग अन्याय भएको प्रतिक्रिया दिएका थिए।
