काठमाडौं – कानुन, न्याय तथा संसदीय मामिला मन्त्री सोविता गौतमको बैंक खातामा १० लाख ५० हजार ३३५ रुपैयाँ मौज्दात रहेको खुलेको छ । सरकारले सार्वजनिक गरेको सम्पत्ति विवरणअनुसार उनले विभिन्न बैंकबाट ऋण लिएको पनि उल्लेख गरेकी छन् ।
गाडी खरिदका लागि उनले राष्ट्रिय वाणिज्य बैंकबाट २० लाख रुपैयाँ ऋण लिएको र त्यसमध्ये ७ लाख रुपैयाँ भुक्तानी गरिसकेको उल्लेख छ। त्यस्तै, एभरेष्ट बैंकबाट पनि २५ लाख रुपैयाँ ऋण लिइएको विवरणमा देखिन्छ।
उनको सम्पत्तिमा सुन, चाँदी र हिरा पनि समावेश छन्। विवरण अनुसार उनीसँग १५ तोला सुन, ९ तोला चाँदी र १ तोला हिरा रहेको छ।
सवारी साधनतर्फ, मन्त्री गौतमले राष्ट्रिय वाणिज्य बैंकबाट २६ लाख रुपैयाँ ऋण लिएर बा ०१–०२९ च ४३३६ नम्बरको गाडी खरिद गरेको उल्लेख गरेकी छिन्।
उनका श्रीमान् गृहेन्द्र घिमिरेको नाममा समेत ठूलो ऋणसहित सवारी साधन रहेको छ। घिमिरेले एभरेष्ट बैंकबाट ९५ लाख रुपैयाँ ऋण लिएर बा ३ च ६७२२ नम्बरको गाडी खरिद गरेको उल्लेख छ। उक्त गाडी खरिद गर्दा ऋण, तलब र पुरानो गाडी एक्सचेन्ज गरिएको विवरणमा उल्लेख गरिएको छ।
