काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले नेवाः बौद्ध धर्म, संस्कृति र अमूर्त सम्पदाको संरक्षण तथा पुस्तान्तरणका लागि सम्यक महादान महत्त्वपूर्ण रहेको बताएकी छन् ।
राष्ट्रपति रामचन्द्र पौडेललाई सम्यक महादानमा सहभागी हुन निमन्त्रणा दिन बिहीबार शीतल निवासमा आयोजित कार्यक्रममा उनले परम्परागत संस्कृति, रीतिरिवाज र अमूर्त सम्पदालाई एक पुस्ताबाट अर्को पुस्तामा हस्तान्तरण गर्नु नै सम्यक महादान आयोजनाको मुख्य उद्देश्य रहेको बताइन्।
अमूर्त सम्पदाको संरक्षण लिखित अभिलेखमा मात्र सीमित नराखी व्यवहारमै निरन्तरता दिनुपर्नेमा जोड दिँदै डंगोलले परम्परागत विधि र रीतिरिवाजको अभ्यासबाट नयाँ पुस्ताले आफ्नो संस्कृति र सम्पदाबारे सिक्ने अवसर पाउने उल्लेख गरिन् ।
उनले भनिन्, ‘ती अमूर्त सम्पदा, परम्परा र रीतिरिवाजलाई निरन्तर रूपमा एउटा पुस्ताबाट अर्को पुस्तामा हस्तान्तरण गर्नुपर्दछ । त्यो लिखित रूपमा मात्र नभई व्यावहारिक रूपमा पनि हुनुपर्दछ ।’
नेपालको मौलिक बौद्ध धर्म र नेवाः बौद्ध परम्पराको पहिचानका रूपमा रहेको सम्यक महादान तथा सम्यक भोजनको परम्परा लोप हुन नदिन सबैको साथ र सहयोग आवश्यक रहेको उनको भनाइ थियो ।
काठमाडौं महानगरपालिकाले आगामी माघ १ गते स्वयम्भूको भुइँखेलमा ऐतिहासिक एवं परम्परागत सम्यक महादान आयोजना गर्दैछ । २२ वर्षदेखि हुन नसकेको यस महादानलाई पुनः निरन्तरता दिन महानगरपालिकाले आयोजना गर्न लागेको हो ।
