काठमाडौं । नेपाली कांग्रेसले पार्टी नेतृत्व र वैधानिकतामाथि भ्रम सिर्जना गर्ने प्रयास भइरहेको भन्दै त्यसको संसद्, संसदीय समिति र आम नागरिकमाझ सशक्त प्रतिवाद गर्ने निर्णय गरेको छ ।
बिहीबार पार्टी पदाधिकारी तथा संघीय सांसदहरूको बैठकपछि सहमहामन्त्री प्रकाश रसाइलीले राज्य संरक्षित तथा राज्य नियन्त्रित व्यक्तिहरूमार्फत पार्टी र नेतृत्वविरुद्ध षड्यन्त्र भइरहेको निष्कर्ष बैठकले निकालेको जानकारी दिए ।
उनका अनुसार निर्वाचनका बेला पार्टीको अद्यावधिक अवस्था र वैधानिकतासँग सम्बन्धित नरहेका व्यक्तिहरूलाई समेत जोडेर नेतृत्वविरुद्ध भ्रम फैलाउने प्रयास भएको कांग्रेसको निष्कर्ष छ । यस्ता गतिविधिको तथ्यसहित विरोध गर्दै वास्तविकता प्रतिनिधिसभा, संसदीय समिति र आम नागरिकसमक्ष पुर्याउने निर्णय भएको उनले बताए ।
कांग्रेसले संसद् अधिवेशन आह्वानको माग गरिसकेको उल्लेख गर्दै रसाइलीले पार्टीमाथि लागेका आरोपबारे संसद् र संसदीय समितिमा सशक्त रूपमा आवाज उठाउने बताए । राज्यले जुनसुकै प्रकारको छानबिन गर्न चाहे पनि पार्टी त्यसबाट पछि नहट्ने उनको भनाइ थियो ।
बैठकमा भोटेकोशी बाढीबाट प्रभावित क्षेत्रका नागरिकलाई सहयोग गर्ने विषयमा समेत छलफल भएको रसाइलीले जानकारी दिए । चाडपर्वका समयमा प्रभावित नागरिकलाई सहयोग गर्ने उद्देश्यले २० गते दिउँसो २ बजे सम्बन्धित क्षेत्रका सांसद तथा जनप्रतिनिधिलाई पार्टी केन्द्रीय कार्यालयमा बोलाइएको उनले बताए ।
उनका अनुसार सभापति र पार्टी नेतृत्वले प्रभावित क्षेत्रका जनप्रतिनिधिसँग छलफल गरी आवश्यक सहयोगका विषयमा निर्णय गर्नेछ ।
