काठमाडौँ । राष्ट्रिय प्रजातन्त्र पार्टी (राप्रपा) का महामन्त्री धवल शमशेर राणाले उपसभामुख पदमा पार्टीले दिएको उम्मेदवारीप्रति आपत्ति जनाएका छन् ।
पार्टीको संस्थागत निर्णय बिना नै उपसभामुख पदको उम्मेदवारी दिएको भन्दै आपत्ति जनाएका हुन्।
प्रतिनिधि सभाको उपसभामुखमा राप्रपाले सरस्वती लामालाई उम्मेदवार बनाएको थियो।
उनले भनेका छन्, ‘ पार्टीका नेता तथा कार्यकर्ताहरू र राष्ट्रवादी साथीहरूले मलाई फोन सम्पर्क गरिरहनुभएको छ।
म प्रस्ट पार्न चाहन्छु — हामी गणतन्त्र विरोधी आन्दोलनमा छौं। गणतन्त्रमा संविधानको नि:शर्त पालना, संरक्षण र कार्यान्वयनको प्रधान दायित्व भएका कुनै पनि जिम्मेवारीमा हामी सहभागी हुनुहुँदैन।’
उनले थपे, ‘पार्टीको प्रजातान्त्रिक पद्धतिलाई चुनौती दिँदै गरिएका कुनै पनि निर्णयमा मेरो हिजो पनि सहमति थिएन, आज पनि छैन र भोलिका दिनमा पनि हुनेछैन।’
