काठमाडौँ । पश्चिम नवलपरासी क्षेत्र नं. १ मा प्रगतिशील लोकतान्त्रिक पार्टी (प्रलोपा) का उम्मेदवार विनोद रेग्मीले उम्मेदवारी त्याग्दै नेपाली काँग्रेसका उम्मेदवार विनोद चौधरीलाई समर्थन गर्ने घोषणा गरेका छन् ।
सोमबार जारी प्रेस विज्ञप्तिमा रेग्मीले आफू चुनावी मैदानबाट अलग्गिएको जानकारी दिँदै फागुन २१ को आम निर्वाचनमा काँग्रेसको पक्षमा उभिने निर्णय गरेको उल्लेख गरेका छन् ।
उनले आफ्ना कार्यकर्ता र समर्थकलाई रुख चिन्हमा मतदान गर्न आह्वान गर्दै लोकतन्त्रको सुदृढीकरण र परिवर्तनको निरन्तरताका लागि काँग्रेसलाई जिताउन आग्रह गरेका छन् ।
२०७९ मा यसै क्षेत्रबाट निर्वाचित भएका काँग्रेसका केन्द्रीय सदस्य तथा उद्योगी विनोद चौधरी विकास र आर्थिक रूपान्तरणको एजेन्डासहित पुनः प्रतिस्पर्धामा छन् । रेग्मीको समर्थनसँगै क्षेत्र नं. १ मा काँग्रेसको चुनावी समीकरण थप बलियो भएको छ ।