काठमाडौँ । नेपाली कांग्रेसको १५औँ महाधिवेशनअन्तर्गत सहमहामन्त्री पदको मतगणनामा रामहरि खतिवडा र अजयबाबु शिवाकोटीले अग्रता लिएका छन्। निर्वाचन समितिले सार्वजनिक गरेको पछिल्लो मतपरिणामअनुसार खुला सहमहामन्त्रीतर्फ खतिवडा पहिलो र शिवाकोटी दोस्रो स्थानमा रहेका छन्।
आइतबार साँझदेखि पार्टीको केन्द्रीय कार्यालय सानेपामा खुला सहमहामन्त्री, महिला सहमहामन्त्री र महिला केन्द्रीय सदस्य पदको मतगणना भइरहेको छ। निर्वाचन समितिका अनुसार विभिन्न छ स्थानमा मतगणना जारी छ।
खुला सहमहामन्त्रीका दुई पदका लागि नौ जना उम्मेदवार प्रतिस्पर्धामा छन्। हालसम्म एक हजार ६८९ मत गणना हुँदा खतिवडाले ७६८ र शिवाकोटीले ५४८ मत प्राप्त गरेका छन्।
त्यस्तै, डिल्लीराम सुवेदीले ४३९, देवेन्द्रराज कणेलले ३३४, विकास कोइरालाले २८४, राजीव ढुङ्गानाले २५३ र रमेशप्रसाद धमलाले २०५ मत प्राप्त गरेका छन्। अमृतकुमार अर्यालले १७६ र विमलराज क्षेत्रीले ६१ मत पाएका छन्।
महिला सहमहामन्त्रीको एक पदका लागि प्रतिमा गौतम र नानुमैया बास्तोलाबीच प्रतिस्पर्धा भइरहेको छ। पछिल्लो मतपरिणामअनुसार गौतम अगाडि रहेकी छन्।
यसैगरी, महिला खुलातर्फ केन्द्रीय सदस्यका १५ पदका लागि ३६ जना उम्मेदवार प्रतिस्पर्धामा छन्।
उक्त पदका लागि अकला गुरुङ, अनिता देवकोटा, इन्दिरा चौलागाई, उमा दाहाल, उर्मिला थपलिया, कल्पना तिवारी, कान्तिका सेजुवाल, कुसुमदेवी थापा, गंगा दाहाल, गंगा शाही, गण्डकी थापा अधिकारी, गीता सत्याल, चिनी पोखरेल (चिनु), जमुना ढकाल, तुलसी देवकोटा, धनाकुमारी खतिवडा, नम्रता बराल, निमा गिरी र निर्मला क्षेत्री उम्मेदवार छन्।
त्यस्तै, निर्मला तामाङ बस्नेत (नीरू), पवित्राकुमारी अर्याल, भगवती काफ्ले भण्डारी, भवानी देवकोटा, विनिता खड्का, विष्णुकुमारी सापकोटा, वासना थापा, मुना भुसाल, मोदती केसी, यस्मिन ढुंगाना, राधिका कटुवाल, रीता थापामगर, रीता सेन ओली, लक्ष्मी पाण्डे, सम्झना खत्री, सुमित्राकुमारी बम र सृजना अधिकारी पनि प्रतिस्पर्धामा छन्।
मतगणना जारी रहेकाले सहमहामन्त्री तथा महिला केन्द्रीय सदस्य पदको अन्तिम परिणाम आउन बाँकी छ।
