काठमाडौं । नेपाल राष्ट्र बैंकले यस वर्षको दशैं तथा चाडपर्वलाई लक्षित गर्दै बैंक तथा वित्तीय संस्थाका एटीएमबाटै १०० रुपैयाँ दरका नोट उपलब्ध गराउन निर्देशन दिएको छ।
राष्ट्र बैंकको निर्देशनपछि केही बैंक तथा वित्तीय संस्थाले साना दरका सुकिला तथा सफा नोट वितरण गर्न मिल्ने एटीएममार्फत सेवा सुरु गरेका छन्।
राष्ट्र बैंकका प्रवक्ता गुरुप्रसाद पौडेलका अनुसार भोटेकोशी बाढीबाट ठूलो जनधनको क्षति भएकाले यस वर्ष नयाँ नोट सटहीका लागि छुट्टै सूचना जारी गरिएको छैन। चाडपर्वलाई लक्षित गर्दै राष्ट्र बैंकको थापाथलीस्थित कार्यालय, प्रादेशिक कार्यालय तथा वाणिज्य बैंकमार्फत गत असोज १ गतेदेखि नै सुकिला तथा सफा नोट वितरण भइरहेको छ।
प्रवक्ता पौडेलले राष्ट्र बैंकले पछिल्ला चार–पाँच वर्षदेखि चाडपर्वमा नयाँ नोट वितरण गर्ने परम्परालाई क्रमशः घटाउँदै लगेको बताए।
राष्ट्र बैंकका अनुसार गत भदौ ३१ गतेसम्म बजारमा चलनचल्तीमा रहेको मुद्रा (करेन्सी इन सर्कुलेसन) रु सात खर्ब ९४ अर्ब पुगेको थियो। दशैंका क्रममा यो रकममा करिब ८ देखि १० प्रतिशतसम्म वृद्धि हुने राष्ट्र बैंकको अनुमान छ।
