एजेन्सी । अर्जेन्टिनाका स्टार फुटबलर लियोनल मेस्सीले राष्ट्रिय टोलीबाट आफ्नो अन्तिम खेल खेल्दै शानदार बिदाइ पाएका छन्। बुधबार बिहान भएको मैत्रीपूर्ण खेलमा अर्जेन्टिनाले बेनिनलाई ३–० गोलले पराजित गर्दा मेस्सीले एक गोल गरेका छन्।
स्टाडियो मोनुमेन्टलमा भएको खेलको पहिलो हाफ गोलरहित बराबरीमा सकिएको थियो। दोस्रो हाफमा भने अर्जेन्टिनाले उत्कृष्ट प्रदर्शन गर्दै तीन गोल गर्यो।
खेलको ४८औँ मिनेटमा निकोलस ओटामेन्डीले गोल गर्दै अर्जेन्टिनालाई अग्रता दिलाए। त्यसपछि ६१औँ मिनेटमा मेस्सीको पासमा निको पाजले गोल गर्दै टोलीको अग्रता २–० बनाए।
७१औँ मिनेटमा मेस्सीले पेनाल्टीमार्फत गोल गर्दै अर्जेन्टिनाको जित ३–० ले सुनिश्चित गरे। अन्तिम खेलमा गोलसँगै उत्कृष्ट प्रदर्शन गरेका मेस्सीले राष्ट्रिय टोलीबाट भावुक बिदाइ पाए।
मेस्सीले यसअघि नै अन्तर्राष्ट्रिय फुटबलबाट सन्यास लिने घोषणा गरिसकेका थिए। सन् २००५ मा अर्जेन्टिनाको राष्ट्रिय टोलीमा डेब्यु गरेका उनले २०७ खेलमा १२६ गोल गरेका छन्।
राष्ट्रिय टोलीका लागि सर्वाधिक गोल गर्ने खेलाडीको सूचीमा मेस्सी दोस्रो स्थानमा छन्। उनीभन्दा अगाडि पोर्चुगलका क्रिस्टियानो रोनाल्डो छन्, जसले १४६ अन्तर्राष्ट्रिय गोल गरेका छन्।
