काठमाडौँ। बंगलादेशका नवनिर्वाचित प्रधानमन्त्रीको शपथ ग्रहण समारोहमा नेपालबाट परराष्ट्र मन्त्री बालानन्द शर्मा सहभागी हुने भएका छन् ।
प्रधानमन्त्री सुशीला कार्कीले परराष्ट्र मन्त्री शर्मालाई उक्त समारोहमा सहभागी हुन जान भनेको प्रधानमन्त्रीका प्रेस सल्लाहकार राम रावलले जानकारी दिए । लगत्तै आजै परराष्ट्र मन्त्री शर्मा बंगलादेशको ढाका जाँदैछन् ।
बंगलादेशमा हालै सम्पन्न निर्वाचनमा बंगलादेश नेसनलिस्ट पार्टी (बीएनपी)ले दुई तिहाइ बहुमत पाएको छ । बीएनपीका प्रमुख तारिक रहमानले प्रधानमन्त्रीको शपथ लिँदैछन् । उनको शपथ ग्रहण समारोह मंगलबार हुँदैछ ।
बंगलादेशमा फरबरी १२ मा भएको आम निर्वाचनमा बंगलादेश नेसनलिस्ट पार्टी (बीएनपी)ले दुई तिहाइ बढी सिट जितेको छ । यससँगै बीएनपीका तारिक रहमानले मंगलबार प्रधानमन्त्री पदको शपथ लिँदैछन् ।
बीएनपीले रहमानलाई संसदीय दलको नेतामा चयन गर्दै प्रधानमन्त्रीमा नियुक्त गर्ने तयारी गरेको छ । रहमान पूर्व प्रधानमन्त्री खालिजा जियाका छोरा हुन् ।
शपथ ग्रहणमा भाग लिन अन्तरिम सरकारका मुख्य सल्लाहकार मोहम्मद युनुसले नेपालसहित चीन, साउदी अरेबिया, भारत, पाकिस्तान, टर्की, यूएई, कतार, मलेसिया, ब्रुनेई, श्रीलंका, माल्दिभ्स र भुटानका सरकार प्रमुखलाई शपथ ग्रहण समारोहमा निमन्त्रणा पठाएका थिए ।
नेपालको तर्फबाट मन्त्री शर्माले प्रतिनिधित्व गर्ने भएका हुन् ।
