ललितपुर। निजी तथा आवासीय विद्यालय अर्गनाइजेसन नेपाल (प्याब्सन) का अध्यक्ष कृष्ण अधिकारीले निजी विद्यालयलाई ट्रस्टका रूपमा नभई कम्पनीका रूपमा सञ्चालन गर्न दिनुपर्ने माग गरेका छन्। उनले निजी विद्यालयको लगानी सुरक्षा र दीर्घकालीन सञ्चालन सुनिश्चित हुने गरी विद्यालय शिक्षा ऐन बनाउन पनि सरकारसँग आग्रह गरेका छन्।
आइतबार ललितपुरमा आयोजित ‘शिक्षा विधेयकमा निजी विद्यालयको लगानी सुरक्षाको सवाल’ विषयक शैक्षिक बहसमा बोल्दै अधिकारीले निजी विद्यालयलाई सेवामूलक, लोककल्याणकारी र गैरनाफामूलक संस्थाका रूपमा सञ्चालन गर्नुपर्ने प्रस्तावप्रति असहमति जनाएका हुन्।
उनले संस्थापकको मृत्यु वा अन्य कारणले विद्यालय बन्द हुने अवस्था अन्त्य गर्न कानुनी व्यवस्था आवश्यक रहेको बताए। निजी विद्यालयमा कार्यरत शिक्षक तथा कर्मचारीलाई श्रम ऐनअनुसार पारिश्रमिक दिन, सामाजिक सुरक्षा कोषमा आबद्ध गराउन र बैंकिङ प्रणालीमार्फत तलब भुक्तानी गर्न आफूहरू तयार रहेको उनको भनाइ थियो। त्यसका लागि विद्यालयको लगानी सुरक्षित हुने कानुनी सुनिश्चितता हुनुपर्ने उनले बताए।
छात्रवृत्तिमा १० प्रतिशत विद्यार्थी पढाउनुपर्ने व्यवस्थाप्रति असहमति जनाउँदै अधिकारीले आर्थिक अवस्था कमजोर भएका विद्यार्थीलाई सरकारी विद्यालयमा निःशुल्क वा सहुलियतमा पढाउने व्यवस्था गर्नुपर्ने बताए। शुल्क तिर्न सक्ने विद्यार्थीलाई निजी विद्यालयले गुणस्तरीय शिक्षा दिने उनको भनाइ थियो।
‘फी तिर्न सक्ने विद्यार्थी हाम्रा स्कुलमा पढून्, तिनलाई हामी क्वालिटी स्कुल दिन्छौँ,’ उनले भने, ‘हामी कमाउनकै लागि आएका हौँ, जोगी हुन स्कुल खोलेका होइनौँ।’
सरकारले निजी विद्यालयलाई जग्गा खरिद, विद्यालयको भौतिक पूर्वाधार र प्रविधि विकासमा केही सुविधा उपलब्ध गराए त्यसबापत शुल्क घटाउन सकिने पनि उनले बताए। सरकारी सुविधाअनुसार मासिक तथा वार्षिक शुल्क घटाउन आफूहरू तयार रहेको उनको भनाइ थियो।
अधिकारीले विद्यालय शिक्षा ऐनले सरकारी र संस्थागत दुवै विद्यालयको दीर्घकालीन सञ्चालन सुनिश्चित गर्नुपर्नेमा जोड दिए।
