काठमाडौं । सञ्जय कृष्णमुर्थीको अर्धशतकप्रेरित जनकपुर बोल्ट्सले नेपाल प्रिमियर लिग (एनपीएल)मा सुदूरपश्चिम रोयल्ससामु १४६ रनको लक्ष्य प्रस्तुत गरेको छ । शनिबार (मंसिर १३) कीर्तिपुरस्थित त्रिवि क्रिकेट रंगशालामा टस जितेर ब्याटिङमा उत्रिएको जनकपुरले निर्धारित २० ओभरमा आठ विकेट गुमाएर १४५ रन बनाएको हो ।
जनकपुरबाट सञ्जयले ५० रन बनाए । उनले ३८ बलमा चार चौका र दुई छक्का प्रहार गरे । सञ्जयको यो पहिलो अर्धशतक हो । दोस्रो संस्करणमा जनकपुरबाट बनेको यो तेस्रो अर्धशतक हो । यसअघि खेलमा जनकपुरका ओपनर आसिफ शेख र वायन पार्नेलले अर्धशतक बनाएका थिए ।
७४–४ को स्थितिबाट सञ्जयले आदित्य महतासँग ५५ रनको साझेदारी गर्दै जनकपुरको मध्यक्रम सम्हालेका थिए । आदित्यले १५ रन जोडे । सञ्जयले त्यसअघि ३५–३ को स्थितिबाट जान निकोल लोफ्टी इटोनसँग ३९ रनको साझेदारी गरेका थिए । इटोनले ३३ बलमा दुई चौका र दुई छक्कासहित ३९ रन थपे ।
ओपनर माज सदाकतले १२ रन बनाए । वायन पार्नेलले १४ रन जोडे । जनकपुरका अर्का ओपनर आसिफ शेख ‘डक’ र शुभ कंसाकार ‘गोल्डेन डक’ भए । १७.२ ओभरमा १२९–४ को स्थितिबाट जनकपुरले दुई रन थप्दा तीन विकेट गुमाएको थियो ।
सुदूरपश्चिमका अभिनाश बोहराले चार विकेट लिए । चार ओभरमा अभिनाशले ३० रन खर्चिए । स्कट कुग्गेलिनले तीन विकेट लिए । चार ओभरमा कुग्गेलिनले २२ रन मात्र खर्चिए । कप्तान दीपेन्द्रसिंह ऐरीका नाममा एक विकेट रह्यो ।
